光頭黨

出自維基百科,自由嘅百科全書
跳去: 定向搵嘢

光頭黨(Skinhead)係60年代英國工人階層興起嘅一種次文化,佢哋因為一個特徵「光頭」而叫做光頭黨。

光頭黨形成係由牙買加音樂文化傳入英國之後,受到英國工人階層歡迎,成為佢哋主要娛樂,成日聚埋一齊就形成社群,後來加入咗政治意識。開頭本來係反種族歧視,但到咗60年代中期,好多巴基斯坦廉價勞工去到英國,搶咗好多英國工人飯碗,好多光頭黨無工做,就成日搞事,特別針對外勞同移民嚟發洩,唔單單係搞搞震,有時重會殺人,結果變成一個種族主義運動。

到咗70年代,光頭黨重發展出佢哋自己嘅制服,變成咗一種街頭文化,佢哋又有自己嘅音樂,重有就係圍繞足球為基礎嘅一套愛國種族主義思想同法西斯主義哲學。

70年代尾光頭黨運動傳到去美國,美國光頭黨學晒英國光頭黨打扮同盲目嘅愛國主義,英美兩國嘅光頭黨因為成日搞事搞到上新聞,光頭黨開始多人識,同時吸引咗一批法西斯主義者加入光頭黨陣形,宣揚白人至上觀念,又喺身上咗一啲白人至上嘅圖案或者口號。加上佢哋獨特嘅街頭文化同衣着品味,吸引咗好多後生仔覺得型而加入。

光頭黨成日搞搞震,專針對非白人,成日話自己嘅工畀啲第二度嚟嘅人搶走,乘機挑起種族仇恨。