《再見理想》係一首Beyond樂隊早期嘅歌，有兩個錄音版本。第一版喺1986年佢哋自己出錢嘅盒帶專輯《再見理想》入邊，黃家駒一個人唱；第二版係劉志遠退出之後，1988年嘅專輯《秘密警察》入邊錄過嘅合唱版，黃家駒、黃貫中、黃家強同葉世榮四個人輪住唱。
黃家駒死後，有現場木結他（掹插蘇，Unplugged）版，Beyond 三個人喺1996年嘅「Live & Basic演唱會」上，黃貫中同客座結他手黃仲賢兩支木結他，加上黃家強嘅低音木結他，而編曲亦唔同。
