冥婚啟示
《非常婚事》（英文：A Fantastic Ghost Wedding，前名《小靈媒》Little Medium Boy），香港片名《冥婚啟示》Revelation of Ghost Marriage，係一部台灣、香港同埋新加坡合作投資嘅電影。由吳君如、李國煌、詹瑞文同埋王柏傑主演[1][2]。電影由新加坡導演王明操刀，全片喺新加坡拍攝。影片獲得香港亞洲電影節2014 － 亞洲新導演獎提名，並且喺電影節作特別獻映，2014年11月20號喺各地上映[3]。
呢套戲講述息影女歌星方曉梅（吳君如飾演）個仔吳善鵬（王柏傑飾演）死咗之後，方曉梅幫佢搵新抱，遇上黃師傅（李國煌飾演）嘅故仔。故事圍繞著親情同死亡題材，反映出華人社會對待死亡嘅微妙審思，凸顯父子、母子、夫妻之間、甚至自己同自己嘅關係[1][4]。
電影主題曲設有粵語同埋華語版本，粵語版叫做《朝朝暮暮》，華語版叫做《是你讓我心動》，都係由張順康作曲兼監製，許日佳填詞，吳君如主唱，韋啟良擔當歌唱監製[5][6]。
主要演員
[編輯]- 吳君如 飾演 吳太太（方曉梅）
- 李國煌 飾演 黃師傅
- 詹瑞文 飾演 吳先生
- 王柏傑 飾演 吳善鵬
- Kenji Fitzgerald 飾演 Ryan
- 陳星兆 飾演 Boy，黃師傅嘅仔
- 陳建彬 飾演 紙紮店老闆
製作過程
[編輯]雖然兩名主要演員吳君如同詹瑞文一直比較多演出搞笑劇情，但係吳君如喺呢套戲嘅造型，就化身息影女歌星，被某啲傳媒形容為蔡琴上身[4]，甚至有啲老化。吳君如對呢個角色安排無意見，但就花咗好多心機喺設計自己喺套戲入面嘅形象。最後吳君如參考咗狄波拉嘅形象，不過有啲傳媒就覺得似蔡琴多啲[7]。呢套戲對吳君如另外一個挑戰，就係由於佢要模仿新加坡人嘅溝通習慣，所以要混合好多種唔同嘅語言去講[8]。
導演王明話，寫呢套戲嘅故仔嘅時候，話潛意識係為吳君如而寫，所以當知道吳君如應承演出嘅時候佢好開心[8]。被問到拍攝嘅時候有咩困難，就提到拍攝期間有時煙霧瀰漫影響拍攝，但整體都算順利[7]。
而飾演吳君如個仔嘅王柏傑就話，今次係第二次同吳君如合作，學到好多嘢。佢又形容，吳君如雖然唔笑嗰陣個樣好嚴肅，但佢其實為人外冷內熱，熟悉咗佢之後會發現佢個人幾好玩[1]。不過，佢又提到因為自己英文唔係咁好，所以同Ryan嘅溝通，有時需要指手劃腳[8][9]。
參考
[編輯]- ↑ 1.0 1.1 1.2 〈馮仁昭四圍超：吳君如激動念亡子 - 馮仁昭 ｜ 蘋果日報〉。《Apple Daily 蘋果日報》 (香港中文)。原著喺2021-02-11歸檔。喺2020-12-28搵到。
- ↑ 李亦筠, 文 / (2014-11-20)。〈《非常婚事》 冥婚题材 如魔幻故事〉。《早报》 (簡體中文)。原著喺2014-11-24歸檔。喺2020-12-28搵到。
- ↑ 〈《冥婚啟示》亞洲新導演獎 香港亞洲電影節 2014〉。Timable (香港中文)。原著喺2016-03-11歸檔。喺2020-12-28搵到。
- ↑ 4.0 4.1 〈参演本地新片《非常媒人》吴君如变蔡琴"上身"〉。web.archive.org。2014-10-07。歸檔時間2014-10-07。喺2020-12-28搵到。
{{cite web}}: CS1 maint: bot: original URL status unknown (link) - ↑ 〈吳君如 Sandra Ng - 《是你让我心动》 （电影《非常婚事》中文主題曲） - YouTube〉。www.youtube.com。喺2020-12-28搵到。
- ↑ 〈吳君如 Sandra Ng - 《朝朝暮暮》 （电影《非常婚事》粵語主題歌曲） - YouTube〉。www.youtube.com。喺2020-12-28搵到。
- ↑ 7.0 7.1 〈吴君如不怕被老化 - 中国 - 娱乐新闻 - 佳礼新闻〉。web.archive.org。2014-10-06。歸檔時間2014-10-06。喺2020-12-28搵到。
{{cite web}}: CS1 maint: bot: original URL status unknown (link) - ↑ 8.0 8.1 8.2 〈《冥婚啟示》(Revelation of Ghost Marriage) 製作特輯2 (導演,演員篇) 12月4日 尋覓終生幸福 - YouTube〉。www.youtube.com。喺2020-12-28搵到。
- ↑ 陈立荷, 文 / (2013-07-13)。〈来新拍《小灵媒》 王柏杰 体会幽灵寂寞〉。《早报》 (簡體中文)。原著喺2016-03-04歸檔。喺2020-12-28搵到。