凱撒法案

凱撒敘利亞平民保護法案（阿拉伯文：قانون_قيصر‎；英文：Caesar Syria Civil Protection Act），簡稱凱撒法案，係一部制裁法案，係美國聯邦政府用來針對敘利亞政府同埋敘利亞總統巴沙爾，喺2020年6月18號生效。

根據呢個法案列明，巴沙爾、巴沙爾老婆仲有其他共39個受制裁對象，喺美國境內嘅所有資產都會俾聯邦政府凍結，而本人亦唔可以入境美國，而任何同巴沙爾政權有著軍事同經濟合作嘅公司、政府同個人，都會受到懲罰^[1]^[2]^[3]。

法案緣起[編輯]

法案名係源自喺敘利亞政府入邊，做過軍事警察法醫攝影師嘅凱撒（Caesar），呢位攝影師係自己帶咗成五千幅，影低咗酷刑受害者屍體嘅相片離境，向美國國會公開，揭發咗敘利亞監倉度嘅大規模酷刑同殺戮，成為咗敘利亞內戰戰爭罪行嘅證據^[4]。

制裁首波對象鎖定咗巴沙爾嘅老婆阿斯瑪（Asma al-Assad）、巴沙爾嘅手足、好幾個敘利亞高級將領，仲有伊朗民兵等政權核心圈嘅人士。其中阿斯瑪係首次被制裁，佢本人係做過投資銀行家，係試過將自己塑造成進步嘅改革派人士，仲有巴沙爾政權現代化嘅代表人物^[5]。

美國國務卿蓬佩奧話，制裁措施「只係開始。美國將持續施加經濟同政治壓力，以切斷巴沙爾政權嘅收入，並令佢哋失去對敘利亞人民發動戰爭同犯下大規模暴行所需嘅支持」。

而黐著敘利亞嘅黎巴嫩，就出現咗經濟同金融混亂，黎巴嫩喺法案生效後，經已急瀉咗七成，喺6月19號嘅黑市找換價，係每六千黎巴嫩鎊換1美金。黎巴嫩人就排長隊搶購稀缺嘅美金。喺貝卡東部地區同南部城市西頓，民眾都喺第二日朝頭早兌換站未開門就排長隊輪候^[6]。