出租女友

  想搵港產片嘅話，請睇＃PTGF出租女友。

《出租女友》（日文：彼女、お借りします）係日本漫畫作品，作者宮島禮吏，由2017年連載到依家，並且從2020年7月開始有改編嘅動畫版本喺電視上播出。故仔係講男主角木之下和也同佢嘅「出租女友」水原千鶴之間發生嘅事。

故事介紹

故事喺講一個大學生木之下和也因為被交往咗一個月嘅女朋友分咗手，自暴自棄之下喺網上租賃咗一個叫做「出租女友」嘅服務，就噉認識咗水原千鶴。由於千鶴扮女朋友扮得十足十叻，反而令和也好激氣，之後畀咗佢最低嘅評分。之後和也同千鶴第二次約會嘅時候，千鶴終於忍唔住同和也發咗火。點知正當兩個人爭拗嘅時候，和也收到消息話佢嘅祖母生病入院，於是兩人即刻趕到醫院。和也為咗實現祖母希望佢早日揾到女朋友嘅願望，就講大話話千鶴係佢嘅女朋友。結果之後和也同時發現千鶴原來係同一間大學嘅校友兼同一棟公寓樓嘅鄰居，於是兩個人嘅關係再次變得複雜起來。

主要人物

木之下和也 （木ノ下（きのした） 和也（かずや））

本作男主角，練馬大學經營系嘅學生，由於被交往咗一個月嘅女朋友七海麻美分咗手，喺網上租賃咗一個叫做「出租女友」嘅服務，就噉認識咗水原千鶴。同千鶴係同一間大學嘅校友，亦係同一個公寓樓嘅鄰居。

水原千鶴／一之瀨千鶴 （水原（みずはら） 千鶴（ちづる） / 一ノ瀬（いちのせ） ちづる）

本作女主角，長黑髮，練馬大學大一學生，同木之下和也喺同一間公寓嘅相鄰單位度住。「水原千鶴」只喺佢工作時嘅藝名，佢嘅真名叫做「一之瀨千鶴」。因為想成為一個女演員而從事咗「出租女友」服務嘅工作，希望喺呢個過程當中鍛鍊演技同埋賺到演員訓練班嘅學費，就噉認識咗和也。千鶴嘅嫲嫲同和也嘅嫲嫲係喺醫院度結識嘅老友。

七海麻美 （七海（ななみ） 麻美（まみ））

練馬大學嘅學生。木之下和也嘅前女友，但好快只同佢交往咗一個月就飛咗佢，令和也一度陷入自暴自棄當中。

更科瑠夏（更科（さらしな） るか）

短黑髮、常戴藍色絲帶，練馬大學學生。因患有心率不正而諗到通過擔任「出租女友」嘅身份嚟揾到心跳加速嘅感覺。喺同木之下和也相處嘅過程中成功做到咗心跳加速，因此愛上咗和也。

櫻澤墨（桜沢（さくらさわ） 墨（すみ））

短紅髮，性格相當之內向。為咗改變自己嘅怕羞而拜託木之下和也幫手一齊進行「出租女友」嘅練習，係同水原千鶴同一家「出租女友」事務所嘅後背。

漫畫出版資訊

漫畫從2017年10月17號起喺講談社出版。

電視動畫播放資訊

2019年12月宣布将会改编为电视动画，2020年7月10日起喺MBS、TBS電視台深夜首播。香港J2台於2022年10月7日至11月11日逢星期五以粵日双语播放，每次连播两集。