刀劍神域

出自維基百科,自由嘅百科全書
跳去導覽 跳去搵嘢

刀劍神域》(日文ソードアート・オンライン)係日本輕小說作品,由川原礫創作。故仔用虛擬實境做主題,主角係桐谷和人,講喺Sword Art Online發生嘅一系列故事。

2002年開始喺網上連載,直到作者憑住《加速世界》攞咗第15回電擊小說大獎大賞後,《刀劍神域》畀出版社睇中,開始出文庫版輕小說。

故事簡介[編輯]

2022年11月6號,虛擬實境大型多人網上角色扮演遊戲《Sword Art Online》正式營運,呢個遊戲要啲玩家戴住同開着一個叫Nervgear嘅好似頭盔咁樣嘅設備先玩得,而戴咗同開着之後,Nervgear會同玩家嘅腦部連繫起上嚟,而玩家喺現實世界度就好似昏迷咗咁,要登出遊戲先會醒番。個遊戲係玩家用刀劍之類武器去打怪,由第1層開始,要有人打低嗰層嘅波士先可以去上一層,越上嘅樓層越難打,而最頂係第100層。玩家打怪打得多會升等級,又可以同其他人組隊增強戰力。

嗰日有大約1萬個玩家戴咗Nervgear登入遊戲,過咗幾個鐘頭之後啲人開始發覺冇法子登出,然後有個自稱係遊戲設計者茅場晶彥嘅人係遊戲度出現,話畀所有人知只有一個方法可以登出,就係要有人打低第100層波士。茅場又同大家講,如果玩家喺遊戲入面嘅生命值跌到0嘅話,冇得再可以復活重新嚟過,佢個Nervgear會放出電磁波破壞人腦,即係響現實世界嘅身體都一樣會死,而如果玩家喺現實世界畀人除咗個Nervgear嘅話,一樣會被燒腦,由於Nervgear入面有電池,就算抆電掣都冇得登出。於是困喺遊戲嗰1萬人裡面有一部分人為咗可以返番去現實世界,侷住冒上生命危險走出安全區打怪,而主角桐谷和人就係其中一位。

喺呢個「死亡遊戲」嘅頭一個月裡面,已經有成2000個玩家死咗。

電視動畫[編輯]

第1期喺2012年7月至12月響日本首播,分做「安格特篇」同「精靈之舞篇」。「安格特篇」有14集,「精靈之舞篇」有11集,加埋有25集。

《刀劍神域Ⅱ》有24集(唔計總集篇),喺2014年7月至12月響日本首播。

《刀劍神域 Alicization》第1部喺2018年10月至2019年3月響日本首播,有24集(唔計總集篇)。第2部喺2019年10月至12月響日本首播。第3部喺2020年7月至9月響日本首播。

特別篇[編輯]

《刀劍神域 Extra Edition》,喺電視動畫第1期完咗之後出,係第1期嘅總集篇加原創故事。

劇場版動畫[編輯]

《刀劍神域劇場版:序列爭戰》,2017年2月響日本上畫,故事嘅時間點係《刀劍神域Ⅱ》之後。

《刀劍神域劇場版 -Progressive- 無星夜的詠嘆調》,2021年10月響日本上畫,故事係改編自《刀劍神域 Progressive》第1卷加原創劇情。

《刀劍神域劇場版 -Progressive- 陰沉薄暮的詼諧曲》,預計2022年9月響日本上畫。

外傳[編輯]

《刀劍神域外傳 Gun Gale Online》,有輕小說、漫畫同電視動畫。