剪接

剪接係電視節目、電影等影片嘅後期製作階段，將已經拍攝好嘅視像、聲音等進行編輯、加入效果等。早期係將菲林剪開，再用特殊嘅膠紙駁埋，操作唔容易而且唔夠準確，剪錯咗就冇得返轉頭。今日係先將影片轉做電腦格式，再用電腦軟件進行剪接。

簡介

影片拍攝完成之後，已經錄製好嘅畫面同聲音除咗有所需要嘅片段之外，亦有好多NG嘅畫面同聲音，導演亦可能要求演員喺同一個場景拍攝幾個唔同位置嘅鏡頭，而且錄製片段嘅次序未必同原本規劃嘅順序一樣。因此，剪接嘅重要任務就係要剪輯出真正需要嘅畫面同聲音，並將佢哋按照劇本加以排序。

效果

影片嘅內容未必可以全部都能夠喺現場拍攝完成，部分節目可能會加入一啲效果嚟強調劇情，例如用慢動作。有時需要加入特效嚟協助劇情嘅表達。另外，剪接之中一段段排序好嘅影片，亦必須喺呢個階段加以銜接。銜接嘅時候除咗單純嘅將片段嘅頭尾相接之外，亦需要依據節目嘅需求加入轉場效果。喺影片剪輯完成之後，最後要為節目加入片頭、片尾同字幕。

聲音編輯

影片通常唔用攝影機錄嗰條聲，而用收音師另外錄嗰條聲，或者另外配音，亦可能需要添加旁白，剪接嘅時候亦需要剪輯聲軌。除咗現場收音之外，若果現場收音效果唔係幾好，亦可以重新配音喺剪接嗰陣修補返聲音嘅問題。除此之外，影片亦經常會加入背景音樂或音效嚟輔助劇情氣氛嘅傳達。