劉知幾

出自維基百科,自由嘅百科全書
Jump to navigation Jump to search

劉知幾661年721年),字子玄,係唐代官員、史學家同史學評論家,徐州彭城縣人。

生平[編輯]

劉知幾屋企歷代都係書香官宦世家,因此自幼就接受嚴格嘅教育。佢對於好似古文尚書呢啲艱澀難明嘅書興趣唔大,但係對於《春秋左氏傳》呢類敘述歷史故事嘅著作就相當鍾意,用咗一年時間就將左氏傳讀完,並喺十七歲嘅時候,遍覽《史記》、《漢書》到《唐實錄》等嘅史書。

佢喺二十歲進入仕途,但佢嘅仕途並唔順利。佢擔任嘉縣主簿,一做就做咗十九年,其後先後擔任著作郎、鳳閣舍人等,同時兼修國史。

開元九年,佢嘅大仔犯罪流放,劉知幾因為幫佢個仔辯護,激嬲玄宗,畀人貶為安州都督府別駕,到任後冇耐就去世,享年六十一歲。[1]

史學理論[編輯]

劉知幾以「多譏往哲,喜述前非」喺古代史學批評史上著稱。佢嘅代表作《史通》係東亞第一部史學評論嘅專書,畀後人譽為「載筆之法家,著述之監史」。喺《史通》入面,佢以尖銳嘅筆法,戳穿咗罩喺儒家經典上嘅光環,揭露咗儒經所載古代聖君明主事蹟嘅虛偽,提出《史記》 、《漢書》以嚟歷代正史中存在嘅不足,並分析史書嘅優缺點,對史書嘅體例、類別加以評論以及闡述,為後代史家提供一本尋找點樣寫出優良史書嘅參考書籍。劉知幾亦提出史才所應具備嘅條件,認為「史才有三長,...,三長謂才也、學也、識也 」,成為咗日後歷史學者對治學嘅要求。[1][2]

參考[編輯]

  1. 1.0 1.1 "劉知幾". 教育大市集 Education Market. 
  2. 楊緒敏:<論劉知幾處世思想的成因與史學思想的淵源>,《史學月刊》,2003年第7期,頁72-77。