蘋果動新聞

蘋果動新聞係壹傳媒為《蘋果日報》推出嘅視像新聞品牌，根據Alexa2018年度總排名顯示，《蘋果動新聞》喺全港網站排第13位。

歷史

《蘋果日報》喺90年代末推出網頁版，當時只有新聞圖片同內文；之後因為香港ISP相繼推出寬頻服務，蘋果開始發展視像新聞。

2008年，《蘋果》以CG繪製電腦三維動畫模擬新聞事件，開始以《蘋果動新聞》品牌推出視像新聞。而台灣版亦緊隨喺2009年11月16號推出，由台灣壹傳媒互動有限公司名義製作。

內容

《蘋果動新聞》內容多數圍繞時事，當有新聞涉及到傷人、殺人、家暴同風化案，都好大機會被「動新聞化」，原意係方便讀者了解事件嘅來龍去脈，但動畫描寫犯罪過程有時會太過寫實，所以喺新聞中立方面受到非議。喺台灣，《動新聞》更受到不同界別嘅社會團體抨擊，例如家暴案同風化案動畫化嘅事件重演，可能會對受害者造成「二次傷害」，台灣《蘋果》更因為咁而被台北市政府罰過幾次錢，當時《動新聞》嘅爭議更影響到壹電視嘅電視廣播牌照申請，當地傳媒人同觀眾主要係擔心《動新聞》嘅風格會被照搬到《壹新聞》。

競爭對手

喺香港同台灣，好似《蘋果動新聞》咁以CG動畫放落新聞報道嘅機構，應該只此一家；香港報館旗下又有提供視像新聞嘅媒體，就有《東方日報》旗下嘅《東網電視》，同埋《都市日報》旗下嘅《都市電視》。

出面網頁