勵德邨
勵德邨（Lai Tak Tsuen）係香港房屋協會轄下嘅一個老牌公共屋邨，嚮香港大坑蓮花宮山，大坑道東面。勵德邨有8座，第1至第4座有27層，分開單雙數座，外型係圓柱體，而第5至第8座有28層，每座有17個單位，外型為長方體。大部份嘅單位可以睇到維多利亞港景色，係一個景觀非常好嘅公共屋邨。
歷史
[編輯]1969年1月，房協宣佈嚮大坑起廉租屋邨，同時由徙置事務處安排受影響嘅木屋區居民搬入徙置區。本來預算嚮1972年起好嘅勵德邨，但係由於地勢，平整地盤工程受阻，加上起緊嗰時冧山泥，搞到條邨遲咗三年起好，1975年第一橦樓先至落成。
條邨係房協第二個自資起嘅屋邨。成條邨有三幢大廈（由八組大廈組成），分兩期起，分別係第一期嘅邨榮樓，嚮1975年5月起好。第二期嘅勵潔樓同埋德全樓，嚮1976年初起好。
條邨一共有2,000幾個單位，但係得1,600幾個接受公開申請，皆因房協保留一啲單位畀舊屋邨（好似明華大廈A座同埋漁光村嘅擠迫戶）用嚟調遷。
條邨落成嗰時好出名，因為勵德邨係當年廉租屋邨之中租金最貴嘅，而且勵潔樓同埋德全樓嚮當時，甚至而家，都係香港唯一嘅圓筒形廉租屋大廈。
名
[編輯]勵德邨取名自香港前工務司鄔勵德（Michael Wright）。勵德邨共分三幢，「勵潔樓」、「德全樓」同埋「邨榮樓」。
而家
[編輯]勵德邨曾經大修，現時嘅外貌可以媲美私人屋苑，加上交通方便，有巴士以及小巴到門前，又近購物熱點銅鑼灣，以及香港中央圖書館等。勵德邨嘅鄰居都係大坑嘅豪宅居民，嚮名校網內。
交通
[編輯]- 港島巴士
- 23B 寶馬山 ↔ 柏道／羅便臣道（只限平日朝早繁忙時間提供服務，星期日及公眾假期唔開）
- 25A 灣仔會展 ↺ 寶馬山
- 26 勵德邨 ↺ 荷李活道
- 41A 華富中 ↔ 北角碼頭
- 81 興華邨 ↔ 勵德邨
- 81A 興華邨 ↔ 勵德邨（只限平日繁忙時間提供服務，公眾假期及學校假期唔開）
- 過海隧道巴士
- 108 啟業邨 ↔ 寶馬山
- 綠色公共小巴
勵德邨自設露天戶外停車場，由威信泊車收費經營。
鄰近
[編輯]連出去
[編輯]
