勷勤大學

學校原校徽。

勷勤大學（粵拼：soeng1 kan4 daai6 hok6），全稱係廣東省立勷勤大學（粵拼：gwong2 dung1 saang2 lap6 soeng1 kan4 daai6 hok6），係原喺廣州嘅一間綜合高等院校，南天王陳濟棠為紀念古應芬而設立。華南師範大學（原教育學院）及廣東財經大學（原商學院）都認勷勤大學係前身。而間學校嘅開設嘅建築工程學系，對嶺南早期現代主義有一定嘅影響，仲延續至中山大學建築工程系及華南理工大學建築學院，係華南建築學科嘅發端。

歷程

當其時嘅廣東省政府主席林雲陔由省庫度撥咗200幾萬元作開辦費，1933年7月將廣東省立工業專科學校擴設做勷勤工學院，設有機械工程系、化工機械系、建築工程系、土木工程專修科；廣州市立師範學校改組成師範學院，加辦商學院。經過一年嘅籌備，大學喺1934年7月1號正式宣告成立，招生開課。林雲陔兼任校長，陸嗣曾任副校長，林礪儒任教務長。

初頭學校分成三個校區，師範學院喺永漢路（依家嘅北京路）廣州市立師範學校原址（市立師範改成學院附屬中學），林礪儒兼任院長，下設文史、數理化、博地、教育等學系。商學院喺光孝路，李泰初任院長，下設經濟、會計、銀行、工商管理等學系。工學院設喺西村增埗，由李錦安任機械系主任，李文翔任化學系主任，羅明燏任土木系主任，林克明任建築系主任。

其中工學院嘅建築學系，嗰陣時仲係中華民國入邊僅有嘅兩個建築學系之一（另一個係中央大學建築系），院址雖然離得遠個市中心，但係各種圖書、儀器、工廠設備齊全，勷大工學院成立後培養咗一班技術人材，得到社會好評。

勷勤大學籌委會後尾原計劃喺增埗左近嘅南海蟠龍崗擴大建設，工程都搞好埋招標，但因為當地好多啲民田，啲農民好鼓譟，就改咗去河南嘅番禺縣石榴崗（原名飛鼠崗）起新校。1936年秋，大學全部學系正式入夥新校舍上堂，三個學院學生有成千人。呢陣時陳濟棠早就落咗台，林雲陔畀蔣光頭調咗去京任職，陸嗣曾就接任校長。之後由於政府人員調動，大學難再攞到發展經費。有話係蔣光頭對以渠嘅政敵做名嘅學校好唔高興先會咁。1937年盧溝橋事變後，勷勤大學三個學院陸續遷入內地。

1938年南京政府以各學院分散播遷為由停辦並拆分，工學院畀併入國立中山大學，師範學院改名廣東省立教育學院，後尾又改叫廣東省立文理學院（華南師範大學前身），林礪儒繼續任院長。商學院改廣東省勷勤商學院，陸嗣曾任校長（廣東財經大學前身）。

校址變遷

1933年成立陣校址分散，工學院喺增步，商學院同本部喺光孝路，而師範學院同附屬中學就喺越秀書院街同西湖路。幾經周折方選定河南石榴崗建築新校舍，但商學院仲話留喺光孝路址。

共和國後石榴崗因位處港口，具戰略意義，南下嘅中國人民解放軍就揀中咗做中南軍區海軍司令部基地後勤部。1952年，廣州區高等學校院系調整工作委員會就咁報告：「適其時，石榴崗三院校（華南師範學院，廣東法商學院，廣東工專）奉令與海軍換讓地址。」就此海軍佔咗石榴崗校園做基地到依家，作海軍南海艦隊駐地同海軍廣州基地。

延續

商學院

廣東省立勷勤商學院喺廣州淪陷前，走咗去廣西容縣，後尾又走去廣東信宜縣水口鎮，再到咗遂溪縣麻章鎮寸金橋（近廣州灣）。師資奇缺下，政府聘用咗秦元邦、蔡世英、曾仲謀、彭麈舜、陳南山、吳勝己、丁景堪、區萃侖等專家充實力量。學院設立咗會計、銀行、工商管理等學系，仲一度增設咗統計學系。1944年秋韶關淪陷前夕，勷勤學院本部，由院長黃典元帶咗大部分師生由粵北走去信宜縣，同時喺興甯縣龍田鎮，夾埋廣東省立文理學院設立咗兩學院聯合分教處。1945年秋續招一年級新生，其中商學院部分約150名學生。日本投降後，兩院聯合分教處喺1946年春返到咗廣州。勷勤商學院本部喺1945年秋返咗廣州，改組成廣東省立法商學院（廣東財經大學前身）。

師範學院

1935年改名教育学院，增设咗教育系。1936年遷石榴崗。1937年9月廣州將淪陷陣，勷勤大學教育學院撤離咗石榴崗。

1938年7月，獨立出來咗做廣東省立教育學院。1939年9月，改名廣東省立文理學院。併入咗廣東省立體育專科學校，增設埋體育專修科。

1945年秋，廣東省政府落柯打，將1929年3月成立嘅廣東省立江村師範學校，併入埋廣東省立勷勤師範學校。1949年中共建政，勷勤師範學校喺10月改名江村師範學校，後尾畀廣東第一師範學校食咗。1946年9月，廣東省立文理學院返到去石榴崗。

1949年廣州市軍管會接管後，改名廣東省文理學院。1951年6月，喺廣東省文理學院基礎上，夾埋中山大學師範學院、私立華南聯合大學教育系，成立咗華南師範學院（依家嘅華南師範大學）。

工學院

1938年夏，畀國立中山大學工學院食咗，同中大工學院既有嘅土木工程系、化學工程系、機械工程系、電氣工程系四個學系，改組成土木工程系、化學工程系、機械工程系、電機工程系、建築工程系五個學系。1952年，中山大學工學院同華南聯合大學理工學院相關嘅學系畀合組成華南工學院（依家嘅華南理工大學）。