北京地鐵8號綫

北京地鐵8號綫（簡化字：北京地铁8号线）係北京地鐵嘅綫路，2008年7月19號通車，從朱辛莊站去到瀛海站，長49.5公里，總共34個站。

佢開通初期時凈開咗從北土城站到森林公園南門站一部份，但嗰時凈限畀有奧林匹克身份註冊卡啲人或有2008年夏季奧林匹克運動會嗰日比賽飛啲觀眾先至有得搭車，即使係殘奧會閉幕之後都唔對外，反而退出營運10日直到同年10月1號先至恢復營運，但嗰時凈限畀有奧林匹克公園入場飛啲遊客先至有得搭車，直到2008年10月9號取消嗮地鐵入場嘅第三方門票限制。從2011年10月15號開始試過退出營運78日，直到2011年12月31號恢復營運兼將北邊總站延長到回龍觀東大街站。2012年12月30號將南邊總站延長到鼓樓大街站。2013年12月28號，路線繼續兩邊延長，其中南邊總站去到南鑼鼓巷站，北邊總站去到朱辛莊站。2018年12月28號，南邊嘅路線亦正式開放，不過凈從珠市口站去到瀛海站，而北邊嘅路線南邊總站延長多咗個站，去到中國美術館站為止。期間路線分成兩部份營運，直到2021年12月31號因中間部份嘅金魚胡同、王府井、及前門三個站通車後先至將南北嘅通道打通埋。