匙羹𢳂蛋

蚊細仔玩

一九二〇年家長玩

伊索寓言，龜兔賽跑，慢有慢好。

匙羹𢳂蛋，運動一種，競技一種，遊戲一種。佢要參加者競步，同時要揸住匙羹，匙羹裝住隻蛋，由頭到尾行去衝綫。一邊走，一邊唔畀隻蛋跌，考人平衡。至於跌咗蛋，鬆啲原地執返再走，嚴啲就出局。出術有黐住隻蛋，或者手指頂住，有時會考慮對應。唔祇用手揸匙羹，用口擔都有。

原本英國鄉村競技，一八九四年有記載，一八九七年喺鄕間用來慶祝英女王域多利鑽禧，同時有扯大纜、蒙眼推車。一九二〇年起，就變成家長玩。直至二十世紀五十年代，劍橋大學聖三一學院，職工都有玩。至今就變成小學運動會項目，類似項目有跳蔴包袋、二人三足等。另外蛋同復活節有關，除咗獵蛋，有啲地方復活節會玩匙羹𢳂蛋。

匙羹𢳂蛋有變化玩法，好似接力咁，隻蛋傳畀下一個，蛋匙羹傳匙羹，又或者，連匙羹連蛋都交畀下一個。

蛋呢。有用生雞蛋，亦有用熟雞蛋，後來亦有木造塑膠造。現存有木造套裝，二十世紀二十年代。現今少用生雞蛋，擔心細蚊仔食物敏感，擔心爛蛋有沙門氏菌，保險唔包，或者保費好貴。

健力士世界紀錄大全，都有好幾種世界紀錄。好似一百米至快，口擔一百米至快。一哩至快，一哩雙手揸至快，一哩口擔至快。一九九〇年，倫敦馬拉松，有參加者用生蛋玩匙羹𢳂蛋，用甜品羹用生蛋走足全程。甚至有人試一個禮拜走到幾遠。