南田

出自維基百科,自由嘅百科全書
Jump to navigation Jump to search

南田,又嗌南村 (粵拼naam4 cyun1),喺廣州河南,北邊到涌尾田心坊,南邊接瑤頭永盛圍。有涌尾涌、南村涌經。南村嘅龍船埋喺馬涌。另外,五中都喺南村嗰頭。

二十世紀八十年代末,四航局出錢填涌尾涌,兼夾整南村紫來大街街頭嘅一段爛路,喺紫來大街同得勝崗之間起咗條石屎人行天橋。

1999年,拆屋起南田馬路,將南村劈成南北兩邊。而家,南田路成咗海珠區主幹道路。

姓氏[編輯]

村民姓區、梁、鄧、曾、周、鍾、黃、齊、張、劉、陸。

  • 區姓:區係南村大姓,出過進士區震。有三間祠堂:熾昌堂、靄芝祖、區家廳。
  • 鄧姓:有鄧家祠,日本仔攻入廣州嗰陣無咗。
  • 周姓:無祠堂,但係出過詩人周誼。

其他姓祠堂有曾張黃三姓祠、梁巷孔廳等。

[編輯]

  • 南田古廟:而家無咗,原址喺家陣嘅江南大道中後街。有碑記《僧成鷲南田神廟記》,文章收錄喺《咸陟堂文集》,原來嘅石碑好早就唔見咗。
  • 泰山祖廟:堂號寶蓮,喺紫來後街附近,即係家陣嘅復興大馬路1-1號。而家無咗,變咗南村路小學。
  • 孤魂廟:喺稔崗,係清朝初期起嘅一座好細間嘅石廟,門口有對聯:「天不絕人絕到此時無可絕 鬼猶求食求得其所有何求」。廟裡面有好多神主牌。廟後面係墳場。而家廟同墳場都無咗。
  • 龍母廟:喺家陣江南大道中後街街尾位,無咗。

[編輯]

  • 《海珠區志》
  • 黃任恆《番禺河南小志》,黃佛頤參訂
  • 鍾暉、劉小玲《海珠古祠堂》,中共廣州市海珠區委宣傳部出品