印加

印加遺跡

印加（粵拼：jan3 gaa1），又叫印加帝國（jan3 gaa1 dai3 gwok3）或者印加文明（jan3 gaa1 man4 ming4），係南美洲古國，1438年正式立國，1533年畀西班牙滅咗。

歷史

印加帝國嘅擴張：
橙紅：帕查庫特克嘅擴張（1438年－1463年）
橙：圖帕克·印卡嘅擴張（1463年－1471年）
黃：圖帕克·印卡嘅擴張（1471年－1493年）
綠：瓦伊納·卡帕克嘅擴張（1493年－1525年）

庫斯科一帶嘅印加人喺12世紀嗰陣仲係一個遊牧部落。喺曼科·卡帕克嘅領導下，印加人建立咗一個細嘅城邦國家庫斯科王國。1438年，印加人開始大規模嘅對外擴張。

帕查庫特克將庫斯科王國重組做印加帝國。

1463年，帕查庫特克個仔圖帕克·印卡·尤潘基開始向北擴張。圖帕克·印卡向南嘅擴張喺馬烏萊河戰役（地點大約喺今日嘅智利中部）之後停咗落嚟。圖帕克·印卡個仔瓦伊納·卡帕克又佔據埋今日嘅厄瓜多爾同秘魯嘅部分地區。

1520年代嗰陣，西班牙人喺探索南美洲西北部嘅時候將天花傳入當地。1527年瓦伊納·卡帕克感染天花病死。佢原先指定嘅繼任人尼南·庫尤奇冇耐亦都死於天花。瓦斯卡爾繼位，冇耐佢同喺北方嘅同父異母細佬阿塔瓦爾帕打起內戰。阿塔瓦爾帕嘅軍隊喺1532年俘擄咗瓦斯卡爾。好快阿塔瓦爾帕喺同西班牙人會面嗰陣被西班牙人捉咗。西班牙人喺第二年處死咗阿塔瓦爾帕。好多人將呢一年（1533年）當做印加帝國嘅滅亡年份。不過亦有啲人將圖帕克·阿馬魯被俘嘅1572年當做印加帝國嘅滅亡年份。

行政

4個蘇尤嘅範圍，橙紅色係欽察蘇尤，綠色係安蒂蘇尤，橙色係孔蒂蘇尤，藍色係科利亞蘇尤

印加帝國分做4個叫「蘇尤」嘅分區。首都庫斯科唔受任何一個蘇尤管轄。