古惑仔

出自維基百科,自由嘅百科全書
Jump to navigation Jump to search
如果係講漫畫,去睇古惑仔 (漫畫)

古惑」又寫做「蠱惑」,響廣東話來講,原本意思係話啲人鍾意耍啲小聰明,去做一啲主流唔認同嘅行為,或者用嚟令自己方便,又或者用嚟行騙,總之係一啲唔正路嘅方法去做嘢,可以話佢聰明,亦都可以話佢心術不正。譬如話:陳仔平時鍾意暱喺低瞓覺,當老細行過見佢張檯冇人,只會以為佢行開咗,咁樣偷懶真係「蠱惑」;又例如:有啲人曾經用兩個港幣一蚊疊埋黐實,整到外表睇嚟好似厚身嘅港幣五蚊咁,然後拎去搭小巴入錢箱,司機唔為意會以為佢入咗五蚊,而其實佢只係入咗兩蚊,可以話呢啲人用咗啲「蠱惑」招嚟呃人,真係夠晒「蠱惑」。

至於話人「蠱惑仔/女」,以前嘅時間普遍用嚟形容啲鍾意賣弄小聰明嘅細路仔,佢哋自以為一啲小聰明可以呃到啲大人,但往往俾啲大人睇穿技倆。

家下嘅「古惑仔/女」,已經泛指啲有黑社會背景又活躍於社區嘅人,佢哋大多數係啲邊緣青少年出身,為所屬黑社會團體或個人利益而從事不法及有違社會法紀嘅勾檔,俗稱「走偏門」,例如:開賭外圍、販賣各類毒品放貴利、爭地盤開片、控制妓女從事淫業、收陀地走私、販賣翻版貨品……等等,佢哋多數係主張以強權暴力嚟凌駕公理,以個人或社團利益為先,置法理於不顧。

因為佢哋通常係從事非法嘅活動,擾亂社會秩序,挑戰法律,損害廣大市民及社會嘅利益,因此亦係方打擊嘅主要目標,亦因為咁,啲黑人物會用各種唔同嘅方法嚟避開警方嘅緝捕網嚟達到佢哋嘅目的,所以呢啲成日諗好多蠱惑招嘅黑人物統稱叫做蠱惑仔,而佢哋亦會將自己從事嘅工作叫「行蠱惑」。

及後因為一本講述黑社會世界漫畫【古惑仔】用咗呢個「古」字,加上相關電影系列大放流行,所以「古惑」呢個寫法近年喺文字上俾人普遍採用。