再生能源

	再生能源
Wind Turbine	生物燃料 • 生物質能 • 地熱; 水力 • 太陽能 • 潮汐能; 浪能 • 風力

再生能源，又叫可再生能源，或者替代能源係指由持續咁補充嘅自然過程中攞到嘅能量來源，唔會釋放溫室氣體或其他空氣污染物。例子包括太陽能、地熱能、水力、風力同生物質能。

再生能源，一般係指一啲喺人類時間尺度內幾乎用唔盡、可以長期供應嘅能源來源，或者可以相對快再生嘅能源。因此佢哋同化石能源唔同，因為化石能源係有限，而且要經過幾百萬年先再生得到。

再生能源連同提升能源使用效率，一般視為可持續能源政策同能源轉型入面最重要嘅支柱。當中包括生物能、地熱能、水力、海洋能、太陽能同風能。呢啲能源主要來自太陽嘅核聚變（呢個係最重要嘅能源來源），亦包括地球自轉同行星運動產生嘅動能，以及地球內部嘅熱能。

全球好多國家都積極推動、發展再生能源。到 2023 年，現代再生能源（即係唔包括用傳統生物質煮食同取暖）已經佔全球最終能源消耗嘅 13.5%。當中大約一半（7.8%）係來自水力、太陽能同風力發電嘅綠色電力，其餘就分別係可再生熱能（4.5%）同交通用嘅生物燃料。

喺全球發電方面，可再生能源都佔咗好重要嘅位置。到 2025 年，再生能源發電量達到 10,730 TWh，佔33.8%，首次超過燃煤發電（10,476 TWh，即 33%），成為全球最主要嘅電力來源。其中水力發電佔最多（14%），之後係太陽能同風能，分別佔 8.7% 同 8.5%，只係略低過核能（8.9%）。其他可再生能源就佔 2.5% ^[1]。