各地監管無人機嘅情況

出自維基百科,自由嘅百科全書
跳去: 定向搵嘢
四軸無人機

自從無人機誕生之後,雖然為人喺空中探索範圍帶嚟咗方便同誕生產業嘅同時,亦帶嚟咗一系列嘅社會同公眾安全問題。部分國家亦推出咗一系列對控制無人機嘅規定同監管。

各國監管情況[編輯]

Flag of the United States.svg 美國[編輯]

喺美國,聯邦航空管理局發佈嘅規定有講明主人飛嘅無人機嘅主要用喺商業定非商業用途範圍[1]。凡係任何喺美國領土上空飛嘅非娛樂性質無人機都必須有美國聯邦航空管理局頒發嘅授權證書先至可以飛得[2]

雖然美國聯邦航空管理局喺2015年8月批准商業無人機可以上天,但最高限喺120呎(110尺,37米)範圍內,而且飛行時間最長唔可以超過10分鐘[3]

2015年12月21號亦發佈咗無人機上天嘅重量限制規定。凡係超過半市斤(250克,0.55磅)嘅無人機必須要去網上註冊[4],註冊時必須要提供個人真名、屋企住址同E-mail信箱地址[4],而且有效期得3年,期滿後可以畀錢續期三年[5]。規定重講未喺網上註冊嘅無人機會被睇成無牌飛天,最高會被處罰27500美金[6];一旦涉及刑事案件範疇,最高會被處罰25萬美金及最多三年監禁嘅處罰[6]

當地亦有規定,凡係未夠13周歲啲人用無人機時,必須要攞咗無人機飛行授權證書嘅家長或監護人陪同使用。重有唔畀喺機場或軍事限制區方圓8千米(5哩,16里)範圍內飛無人機。

英國 英國[編輯]

喺英國,民用航空管理局發佈嘅規定有講明,從2013年開始,凡係揸20公斤(40市斤,44磅)以下嘅無人機上空,必須要喺控制者嘅遙控範圍內操作,飛行高度最高唔可以超過120米(394呎,360尺)。唔畀喺大城市或人山人海嗰150米(492呎,450尺)半徑範圍內飛無人機;亦唔畀喺人或建築嗰50米(164呎,150尺)半徑範圍內飛無人機。使用範圍凈限喺非商業活動[7][8]

澳洲 澳洲[編輯]

喺澳洲,民航安全局喺2013年發佈咗無人機嘅使用規定,一定要喺控制者嘅遙控範圍內操作,而且既唔可以靠近人嗰打橫10米(33呎,30尺),打掂30呎(27尺,9米)範圍內[9];又唔可以靠近人流密集區域[9];亦唔可以喺機場嗰5.5千米(3哩,11里)方圓範圍內飛無人機[10]。另外亦有規定唔畀喺晚黑時段或多雲、橫風橫雨、行雷天氣飛無人機[9]。喺空中管制區域範圍內,最高限制飛到400呎(366尺,122米)[9]

當地亦有規定,凡係揸超過2公斤(4.41磅,4市斤)嘅無人機喺上天前,必須要向民航安全局辦正牌照或申請批准先至得[9]

Flag of Japan.svg 日本[編輯]

喺日本,國土交通省喺2015年12月10號實施咗用無人機嘅規定。凡係揸超過200克(7.05安士,4両)嘅無人機上空,必須要喺控制者嘅遙控範圍內操作[11]。既唔畀喺晚黑時段飛無人機,又唔畀用無人機傳送易燃易爆及有毒性危險品,更加唔畀喺無人機送緊嘢時以高空砸物形式傳送[11]。飛嘅範圍凈限喺150米(492呎,450尺)高空以內,唔畀靠近人、物及第三方事物嘅30米(98呎,90尺)範圍內[11][12],亦唔畀喺人流密集或活動舉辦地嘅上空飛過[11],更加要盡量避開機場嘅安全淨空範圍[11]。一旦違反,最高會罰50萬jen1[11]

但喺突發事件(例如救援隊做搜索行動、災難現場或車禍現場拍攝)或國家、地方政府部門用無人機拍攝時,唔受以上呢啲規定限制,但一定要注意使用安全[11]

Flag of Singapore.svg 星加坡[編輯]

喺星加坡,2016年6月1號實施咗無人機嘅使用規定同範圍[13]。凡係揸唔夠7公斤(14市斤,15.43磅)嘅無人機上空,必須要喺控制者嘅遙控範圍內操作[14],而且飛之前要保證無人機冇任何質量差錯[14]。雖然當地允許無人機帶物品做上空傳送,但總重量最多唔畀超過7公斤(14市斤,15.43磅),而且帶嘅物品唔畀有黐埋式、懸吊式、易鬆散式三者是旦一種[14],甚至唔畀傳送易燃易爆及有毒性危險品[14]。無人機飛緊嗰時唔畀做任何形式嘅裝卸物品動作[14]。唔畀喺人流密集地上空、十字車頭殼頂、及喐緊嘅機動車上邊飛過[14]。飛嘅範圍凈限喺200呎(183尺,61米)高空以內,唔畀揸入距離機場或軍事管理區嘅5千米(3哩,10里)範圍內,以及敏感區、禁區、崖广地域及航空管制區入面[14]。若果揸超過7公斤(14市斤,15.43磅)或涉及商業用途嘅無人機上空,必須要由無人機嘅總管理人員或有許可證明啲操控人員操控先至得[14]

Flag of Ireland.svg 愛爾蘭[編輯]

喺愛爾蘭,2012年5月1號實施咗無人機嘅使用規定同範圍[15]。凡係揸未夠兩市斤(1公斤,2.20磅)嘅無人機上空,必須要喺控制者嘅遙控範圍內操作[16][17],唔畀喺機場周邊5千米(3哩,10里)方圓範圍內、人流密集或活動舉辦地上空、商業區上空(唔理係市區定鄉下、城中村地帶)、軍事管理區及監獄等敏感地域上空、存在影響航班升降嘅空間範圍飛過[16][18]。亦唔畀靠近人、船、機動車及唔係自己本人控制嘅設施嗰30米(98呎,90尺)範圍內[16][18];除非呢啲地域有地主允許畀無人機著陸或降落[18]。另外,飛嘅水平範圍有限制喺半徑300米(984呎,900尺)以內,垂直範圍有限制喺400呎(366尺,122米)以內[18][16]

另外,當地亦有規定以下呢啲:

  • 唔理係有意定無意揸無人機,都唔畀做出危及個人生命或財產安全等一系列影響社會秩序行為[18][16]
  • 凡係揸重量超過兩市斤(1公斤,2.20磅)嘅無人機,上空前都必須要經過愛爾蘭航空管理局批准先至得[18][16]
  • 凡係揸商業無人機,上空前唔單止要要經過愛爾蘭航空管理局批准,揸無人機嘅人一定要去過航空訓練班培訓過兼攞埋證先至揸得[18][16]
  • 未夠16周歲啲人用無人機時,必須要攞咗無人機飛行授權證書嘅家長或監護人陪同使用[18][16]

Flag of South Africa.svg 南非[編輯]

喺南非,航空管理局喺2014年4月初發佈咗針對無人機嘅規定:凡係未攞牌照而上南非領空飛嘅無人機,一律會按無牌飛行而處理(即使係辦緊牌照都會同樣對待)[19]。南非嘅民航法入面有規定,凡係做出無牌飛行嘅行為,一叉住將會處罰最高50000蚊及最高10年刑事監禁[19]

但2015年7月1號,航空管理局修改過法案,定咗無人機嘅使用範圍[20]。其中飛行高度最高唔可以超過120米(394呎,360尺)[20];未經航空部門批准,唔畀靠近個人或集體、人流密集嗰50米(164呎,150尺)範圍內飛無人機[20];及唔畀喺靠近差館、監倉、罪案現場、核電站法院、國家機密地方飛無人機嘅規定[20]

尤其係民用無人機(計埋航拍機),都唔畀喺機場附近嘅淨空範圍內飛行,亦唔畀喺公家道路做降落或著陸嘅行為[20]。另外,雖然民航局有規定唔畀喺橫風橫雨、行雷等惡劣天氣期間飛無人機,但允許喺能見度比較差或晚黑時段飛無人機[20]。不過唔理喺咩時段,唔畀攞無人機做任何空中拉貨、特技表演、組隊飛行嘅行為[20]

當地亦有規定啱攞咗牌照而飛無人機嘅控制者,得一年嘅有效期[20],而且飛咗幾多次天,政府都會有做記錄(一出單大頭佛會記得好詳細)[20]

Flag of the People's Republic of China.svg 中國[編輯]

喺中國大陸,2015年12月中旬出咗無人機嘅使用規定同範圍[21]。凡係揸重1.5~7公斤(3~14市斤,3.31~15.43英磅)範圍內嘅無人機上空,必須要喺控制者嘅半徑500米(1,640呎,1,500尺)範圍內操作[22][23],飛行高度最高唔可以超過120米(394呎,360尺)[22][23]。既唔畀喺晚黑時段飛無人機,又唔畀揸入距離機場或軍事管理區嘅5千米(3哩,10里)範圍內,以及敏感區、禁區、崖广地域及航空管制區入面[22][23],更加唔畀喺酒後或藥後8個鐘內揸無人機[22]。唔理係有意定無意揸無人機,都唔畀做出危及個人生命或財產安全等一系列影響社會秩序行為[22]

另外,凡係揸超過4公斤(8市斤,8.82磅)嘅無人機,上空之前必須要裝咗兼開着脈波電子圍欄[22]

2017年6月1號,民航局正式實施咗規定,要求冚唪唥超過半市斤(250克,8.81安士)嘅無人機都必須去網上註冊[24],註冊時必須要提供個人真名、家庭住址、聯繫方式同產品序列號,使用理由[25]

Flag of Hong Kong.svg 香港[編輯]

香港法例第448C章《1995年飛航(香港)令》規定,輕過7公斤嘅航空器(包括無人機)雖然唔使向民航處攞牌,但操作嘅人都要確保唔會因為魯莽或者疏忽操作航空器而危害其他人或者財產嘅安全[26]。另外,香港個人資料私隱專員公署響2015年3月發出咗「閉路電視監察及使用航拍機指引」,提醒航拍機(即係有影相功能嘅無人機)用家保障私隱嘅責任[26]

Flag of Indonesia.svg 印尼[編輯]

喺印尼,2015年9月1號實行嘅第180款法案入面有講到無人機嘅使用範圍。

其中包括操作嘅人都要確保唔會因為魯莽或者疏忽操作航空器而危害其他人或者財產嘅安全[27],及喺指定無人機嘅限制大氣電波範圍內運行[27],及集體玩無人機時要通過批准先至得嘅規定[27]。若果操作嘅人揸無人機干涉到團隊範圍或未經批准而擅自飛無人機上天嘅集體團隊,都會處以最高四百萬印尼盾或最多四年嘅刑事監禁[27][28][29]

規定亦有講到任何人都唔畀以商業形式影個人或佢哋嘅繼承人,除非個人或佢哋嘅繼承人以書面形式同意咗影先至得[28][29]。一旦違反,會被罰最高五百萬印尼盾[28][29]。根據當地法律,凡係≥2人控制無人機都會被睇成商業行為[28][29]。但喺非商業用途下影咗兼發佈其他帶人物肖像啲相係唔會被追究責任[28][29]

不過佢哋亦有規定影響航班升降嘅淨空範圍、機場入面、嚴控區域入面唔畀飛無人機[29]。除非個機場停用或廢棄咗,但操作人所屬職業凈限喺民航界範疇[28]。飛行高度都有限制喺500呎(457尺,152米)範圍以內[28],若果諗住飛到超過500呎(457尺,152米)高度嘅地方,必須要經過印尼航空部門批准先至得[29]。尤其係航拍機,必須要喺操作人嘅一里(500米,3.22哩)半徑嘅視覺範圍內操控[28],若果係用嚟做拍電影、劇集、短片、航拍繪圖呢四樣是旦一種,都要通過當地政府或認可機構批准兼喺指定範圍內拍,但唔畀用嚟做破壞他人財產用途[28]

另外,住宅區嗰一里(500米,3.22哩)半徑範圍內都唔畀飛無人機[28]

[編輯]

  1. "Section 333". www.faa.gov. 喺2015-10-19搵到. 
  2. "FAA: Certificate of Authorization or Waiver (COA)". 
  3. Lawyer gets FAA to approve paper airplane
  4. 4.0 4.1 Drones in America Must Now Be Registered. Here's What You Need to Know. 《Inc.》. December 16, 2015. December 16, 2015 查過。.
  5. Looking Forward After the FAA’s Drone Registration Regulation. Covington & Burling LLP. 16 December 2015. 17 December 2015 查過。.
  6. 6.0 6.1 Williams, Thomas E. (17 December 2015). "That Drone in Your Holiday Stocking Must Now Be Registered With FAA". The National Law Review. Neal, Gerber & Eisenberg LLP. 喺17 December 2015搵到. 
  7. The skies open up for large civilian drones. BBC News Technology. 29 August 2012. 8 April 2013 查過。.
  8. Sclesinger, Fay (16 March 2013) "Animal activists to use drones in fight against illegal hunting" The Times, Page 17'; subscription required
  9. 9.0 9.1 9.2 9.3 9.4 Australia Drone Regulations Summary
  10. Unmanned Aerial Systems in controlled airspace
  11. 11.0 11.1 11.2 11.3 11.4 11.5 11.6 無人航空機(ドローン・ラジコン機等)の飛行ルール 国土交通省
  12. 飛行して良い場所と高さの規制 Drone-Biz
  13. Drone laws in Singapore. Straits Times. 2016-04-19.
  14. 14.0 14.1 14.2 14.3 14.4 14.5 14.6 14.7 Flying of Unmanned Aircraft CAAS
  15. "Operation of Unmanned Aircraft Systems in Irish Airspace". Irish Aviation Authority. 喺6 July 2013搵到. 
  16. 16.0 16.1 16.2 16.3 16.4 16.5 16.6 16.7 Drone Flying in Ireland – Your Questions Answered
  17. "APPLICATION TO OPERATE AN UNMANNED AIRCRAFT SYSTEM". Irish Aviation Authority. (原先內容喺5 January 2014歸檔). 喺6 July 2013搵到. 
  18. 18.0 18.1 18.2 18.3 18.4 18.5 18.6 18.7 No more flying your drone over military bases from Monday. The Irish Times. 17 Dec 2015. 27 Dec 2015 查過。.
  19. 19.0 19.1 CAA to hit illegal drone flyers with hefty fines. News24. 3 April 2014. 3 April 2014 查過。.
  20. 20.0 20.1 20.2 20.3 20.4 20.5 20.6 20.7 20.8 12 Things you need to know about SA's new drone rules. News24. 18 May 2015. 20 May 2015 查過。.
  21. "中国数万无人机黑飞:第一部法律来了!". 上方文Q. 快科技. 2015-12-06. 
  22. 22.0 22.1 22.2 22.3 22.4 22.5 轻小无人机运行规定(试行)
  23. 23.0 23.1 23.2 看中国民航局对无人机的规定 自娱自乐航空迷
  24. 8月31日前完成无人机实名登记 不登记将受到处罚. 《新华社》. CCTV.com. 2017-06-01.
  25. 航空公司航空器加改装计划申报要求
  26. 26.0 26.1 立法會十題:規管無人駕駛飛機系統
  27. 27.0 27.1 27.2 27.3 Ketentuan Hukum Terkait Drone HUKUM ONLINE
  28. 28.0 28.1 28.2 28.3 28.4 28.5 28.6 28.7 28.8 28.9 PENGENDALIAN PENGOPERASIAN SISTEM PESAWAT UDARA TANPA AWAK DI RUANG UDARA YANG DILAYANI INDONESIA
  29. 29.0 29.1 29.2 29.3 29.4 29.5 29.6 "PM 90 Tahun 2015" (pdf) (用Indonesian寫). Dirjen Perhubungan Udara, Kementrian Perhubungan Republik Indonesia. 第 7頁. 喺9 September 2015搵到.