四呼
四呼（粵拼：sei3 fu1）係中文音韻學嘅術語。喺音韻學，從明代以降，基於韻母（呢個韻母包埋韻腹同韻尾）嘅韻頭同韻腹嘅口形，將韻母分爲四類：開口呼、合口呼、齊齒呼、撮口呼。
概要
[編輯]四呼由來自宋代以降後期中古音嘅韻類分類，亦即等呼。喺等呼，以嘴脣係咪圓分成兩個大類：開口呼同合口呼。然後再根據主元音嘅位置再細分爲四等，加埋四個等嘅開合總共八個類。
明代試行新嘅分類，創出新嘅呼。清代，喺潘耒嘅《類音》度總結出四呼，而家嘅中文學仲用緊。
四呼
[編輯]開口呼（hoi1 hau2 fu1）係指唔接韻頭嘅韻母，亦即唔係[i]、[u]、[y]打頭嘅韻母。喺粵語，a、aa、e、o、oe、eo屬於開口呼（連埋-i、-u、-m、-n、-ng、-p、-t、-k韻尾）。例字：亞、挨、交、岩、晏、罌、鴨、押、呃、矮、嘔、暗、銀、鶯、合、兀、扼、誒、鏡、夾、劇、柯、愛、奧、安、江、喝、各、靴、向、卻、最、進、卒。
齊齒呼（cai4 ci2 fu1）係指韻頭係[i]嘅韻母，亦即用i/j打頭嘅韻母。喺粵語，i屬於齊齒呼（連埋-u、-m、-n、-ng、-p、-t、-k韻尾），用聲母j打頭嘅字亦係齊齒呼。例字：以、要、豔、延、應、頁、熱、亦、也、曳、夜、喲、陽、叡。
合口呼（hap6 hau2 fu1）係指韻頭係[u]嘅韻母，亦即用u/w打頭嘅韻母。喺粵語，u屬於合口呼（連埋-i、-n、-ng、-t、-k韻尾），用聲母w打頭嘅字亦係合口呼。例字：烏、會、換、紅、活、屋、話、爲、搲、和。
撮口呼（撮讀咄，cyut3 hau2 fu1）係指韻頭係[y]嘅韻母，亦即用yu打頭嘅韻母。喺粵語，jyu/yu屬於撮口呼（連埋-n、-t韻尾）。例字：喻、縣、月。
另外，粵語嘅鼻音獨立韻m、ng唔屬於四呼範疇。呢兩個其實都仲係聲母，但屬於同零聲母相對嘅零韻母，亦即係空韻嘅情況。
其中，呢四呼嘅分法係分別按開合、洪細而分成四類，開口呼同齊齒呼係開口，合口呼同撮口呼係合口，開口呼同合口呼係洪音，齊齒呼同撮口呼係細音。下面份表顯示佢哋嘅關係。
| 洪音 | 細音 | |
|---|---|---|
| 開口 | 開口呼 | 齊齒呼 |
| 合口 | 合口呼 | 撮口呼 |
四呼接聲母時，會因爲聲母類別而有所揀擇。喺接脣音聲母時（包括重脣、輕脣），唔會有開合之分，亦即只有開口或合口韻母，無論粵語定普通話，開合口喺脣音聲母都唔構成對立。
喺日文漢字讀音亦有類似中文洪細嘅講法：開口呼、合口呼（洪音）叫做「直音」，齊齒呼同撮口呼（細音）叫做「拗音」。