名創教育

出自維基百科,自由嘅百科全書

名創教育係一間以出版教科書為主嘅出版社,主要出版中、小學教材,喺香港名下有品牌新亞洲出版社同文達出版,係新加坡公司Times Publishing Group旗下[1][2]

業務[編輯]

佢哋喺香港,新加坡仲有好多地方都有出版教科書。並且會同唔少其他公司合作。例如,喺新加坡,佢哋就有同新加坡報業控股合作推出關於培養讀報習慣嘅教材[3][4]

爭議[編輯]

喺香港,環繞名創教育嘅爭議主要係關於佢哋嘅教科書內容。佢哋唔止一次被發現刪去一啲關於香港人應有人權嘅內容,但係對唱好北京同香港政府嘅內容就保留,甚至增加篇幅。

2017年2月被勒索軟件入侵[編輯]

佢哋本身係新加坡教育部最大嘅網上學習服務供應商。喺2017年2月,佢哋嘅系統被勒索軟件入侵。最後佢哋被罰4萬新加坡元[5]

出版兒童繪本《誰贏了? 》被指涉及種族歧視[編輯]

喺2020年7月,佢哋喺新加坡出版嘅華文兒童繪本《誰贏了? 》因疑似種族歧視被網民批評,最終名創教育要道歉並且回收嗰本書[6]

初中生活與社會及通識教科書過濾對政府負面描述[編輯]

2020年8月,包括名創教育在內嘅一啲教科書出版社,被發現將一啲敏感內容過濾。其中名創教育出版嘅《探索生活與社會》被發現,刪去警察向示威者噴胡椒噴霧嘅漫畫,又將普選嘅意義由「提升市民對本地的認同」改為「提升市民對香港特區的認同」。教協副會長、通識科教師田方澤回應事件嘅時候就話,初中生思維已開始成熟,有足夠智力分析同埋討論具爭議嘅時事議題。佢指出,喺香港核心價值單元涉及集會自由,而警隊向示威者噴面等處理示威嘅手法限制集會自由,呢啲都係合理討論,刪除是刻意迴避事實[7][8]

公民與社會發展科教科書歌頌中共偏頗內容[編輯]

2021年4月,名創教育被揭發佢哋出版嘅《新領域公民與社會發展》教科書,「香港社會的多元文化特徵」課題嘅內容單向同偏頗,追捧中國民族主義。書本入面嘅內容話,中國人慶祝聖誕對傳統造成衝擊,令西方國家軟實力喺中國不斷滲透同擴張,跨國企業侵蝕發展中國家嘅本土文化,又以「文化帝國主義」漫畫描繪迪士尼麥當勞卡通人物著軍服侵略別國文化等。此外,對於中國近年經濟發展嘅成就,教科書內就大力吹捧,對於中國唔同社會問題,甚至係中港矛盾,香港人公民抗命嘅內容,本書就只係用咗好少篇幅提及[9][10][11]

學者葉蔭聰批評,就連喺中國內地,公開反對過西方節日嘅人都係少數,現代中國一直都有西方文化元素,共產黨、社會主義等概念亦源自西方。對於「文化帝國主義」漫畫,葉蔭聰就話呢個概念好複雜,但係肯定唔會有人揸住支槍要你消費佢文化,批評漫畫係將議題過度簡化,反而荷里活電影同本土電影生存空間等值得討論嘅議題就唔見佢哋討論,完全係配合官方議程而寫[10]

教育局回應話,公民與社會發展科嘅教科書需要送審,但係送審細節暫時未定好,而呢份教材亦未送審,出版社將教材用公民與社會發展科「課本」形式編印,好可能會搞到學校或者公眾誤會,對名創教育呢個做法深感遺憾[10][12]

參考[編輯]

  1. "Marshall Cavendish Education". www.marshallcavendish.com.hk. 喺2021-04-29搵到.
  2. 經驗開發優質本地教材 創教育總經理兼社長黃燕如博士專訪借鑑新加坡STEM 經驗開發優質本地教材 - (OpenSchool). www.openschool.hk (香港中文). 喺2021-04-29搵到.
  3. 业控股与名创教育合作 推出中小学生读报系列书籍 | 早报. www.zaobao.com.sg (英文). 喺2021-04-30搵到.
  4. 上读报 新书发布与对话会 | 早报. www.zaobao.com.sg (英文). 喺2021-04-30搵到.
  5. 罗妙婷, 文 /. 索软件入侵名创教育系统 | 早报. www.zaobao.com.sg (英文). 喺2021-04-29搵到.
  6. 尹云芳, 文 /. 有名人被"取消"?科普网络"取消文化" | 早报. www.zaobao.com.sg (英文). 喺2021-04-30搵到.
  7. 育淪陷商河蟹初中生活與社會及通識教科書 警噴椒持棍打壓示威漫畫被消失 | 蘋果日報. Apple Daily 蘋果日報 (香港中文). 原著喺2021-04-29歸檔. 喺2021-04-29搵到.
  8. . sites.google.com (香港中文). 喺2021-04-29搵到.
  9. 社科新書hard sell國民身份認同: 人治不一定全是負面 | 蘋果日報. Apple Daily 蘋果日報 (香港中文). 原著喺2021-04-30歸檔. 喺2021-04-29搵到.
  10. 10.0 10.1 10.2 社科新書反對洋節 諷迪士尼麥當勞如穿軍服持槍 | 蘋果日報. Apple Daily 蘋果日報 (香港中文). 原著喺2021-04-29歸檔. 喺2021-04-29搵到.
  11. 版社偷步出公社科新書 內容含反對洋節西方文化. 紀元時報 香港|獨立敢言的良心媒體 (香港中文). 喺2021-04-29搵到.
  12. 胡家欣 (2021-04-29). 社科首有教師用書曝光 保留公民抗命刪例子 教育局指未送審. 港01 (香港中文). 喺2021-04-29搵到.