吳多泰

吳多泰（1911年—2005年）係香港生意人，祖籍海南文昌。最初主要經營地產生意，後來又涉足證券投資等。

生平

吳多泰1911年喺柬埔寨出世，小學之後去咗中國讀書，二戰前已經嚟到香港做生意。二戰之後，面對香港人口大幅增長，佢喺1947年首創以「分層出售」嘅形式賣樓，將一幢樓嘅業權拆細成好幾份，以後買樓唔再係一層層噉買，令到多啲人可以買樓，呢個創新嘅賣樓制度奠定香港日後地產業興盛嘅基礎，吳多泰亦成為當期時比較大嘅地產商。

1965年，香港地產建設商會成立，佢係創會會董之一。

政治參與

1982年，吳多泰參加咗第一屆香港區議會選舉，不過輸咗。

1983年，中國委任咗佢做全國政協委員，佢一路做到1993年，之後由老婆朱蓮芬接棒。

1985年，基本法諮詢委員會成立，佢畀中國委任做諮詢委員會委員（諮委）。

屋企

吳多泰第一任老婆叫戴傑文，喺1972年死咗，之後吳氏續弦，娶咗朱蓮芬做老婆。

吳多泰有五個仔同兩個女，都係同戴傑文所生。