吳美雲 (音樂人)

  呢篇文講讚美操創辦人。想搵台灣出版家嘅話，請睇吳美雲 (出版家)‎。

吳美雲（1936年11月21號—）係台灣音樂人，讚美操創辦人。曾任YAMAHA音樂教室教師八年，發行幼兒音樂教育教材創作，出版過八集音樂作品：《幼兒音樂123》，創作過幾百首兒歌。

生平

吳美雲係彰化花壇人，廿八歲移居台北，當時係位小學老師。公館長老教會嘅徐景民牧師，知道吳美雲好鍾意音樂，但係覺得佢學音樂進度麻麻地，因此建議佢報考台灣神學院嘅宗教音樂系。吳美雲聽咗徐牧師嘅建議之後，就辭咗小學老師嘅工作，考入台灣神學院。神學院畢業之後，佢就同老公移居美國。仔女長大之後，吳美雲返到台灣，投身長達十二年嘅兒童音樂教育工作。呢段期間吳美雲創作咗非常多嘅兒童音樂同音樂學習教材，當時有好多幼稚園都用吳美雲所寫嘅音樂教材作為佢哋嘅音樂課本。

創立讚美操

吳美雲係基督徒，返到台灣之後，每朝早都會去屋企附近嘅榮星花園做運動，喺嗰度有好多嘅運動團體，例如係太極拳、元極舞…等等，大概有三十幾個唔同嘅團體，每日喺公園度帶領人做運動；有三個月，吳美雲每朝都參加呢啲運動團體嘅運動。後嚟，教會嘅師母同吳美雲講，話佢哋教會嘅會友，每朝早都去公園同嗰啲運動團體做早操，但係嗰啲團體多數都係佛教或道教嘅團體，所以嗰啲會友，除咗朝早同嗰啲運動團體做運動之外，亦開始參加佢哋舉辦嘅宗教活動。嗰位師母就勸佢教會嘅會友，唔應該再去參加嗰啲民間信仰嘅活動；但係佢嘅會友回應佢話：「除非，你創立一個基督教嘅運動團體，我就唔再去。」

吳美雲聽咗教會師母講嘅嘢之後，亦都覺得自己呢三個月以嚟所參加嘅運動團體，多數都係其他宗教嘅運動團體。因此吳美雲就向神祈禱話：「神阿！求祢畀我自己創作一個屬於祢嘅運動團體。」就係噉樣，吳美雲開始用聖經嘅話語寫成詩歌、設計動作，創作出一套能夠既可以做運動、亦可以敬拜神嘅讚美操。

2002年2月吳美雲開始喺榮星花園帶領教會裏面好多嘅會友，以佢所創作嘅讚美操做運動；吳美雲亦出錢製作音樂DVD，出版第一集嘅讚美操教學光碟。吳美雲期望以讚美操所使用嘅《聖經》經文，加上優美嘅旋律，配合為健康運動而設計嘅肢體動作，令到更多人能夠聽到福音，並進一步成為兼顧基督教信仰同健康生活嘅全民運動，吳美雲就係噉樣創立咗屬於基督教嘅讚美操。