讚美操
讚美操係由台灣音樂人吳美雲老師作曲編舞，將《聖經》內容編成歌詞，配合伸展動作而成。舞蹈種類多元化，動作快慢都有，有優柔嘅、有芭蕾舞性嘅、有啲似打拳嘅、亦有帶氧運動嘅，適合唔同年紀嘅人。
起源[編輯]
吳美雲每朝早都會去屋企附近嘅公園做運動，喺嗰度有好多嘅運動團體，例如係太極拳、元極舞…等等，大概有三十幾個唔同嘅團體，每日喺公園度帶領人做運動；有三個月，吳美雲每朝都參加呢啲運動團體嘅運動。後嚟，教會嘅師母同吳美雲講，話佢哋教會嘅會友，每朝早都去公園同嗰啲運動團體做早操，但係嗰啲團體多數都係佛教或道教嘅團體，所以嗰啲會友，除咗朝早同嗰啲運動團體做運動之外，亦開始參加佢哋舉辦嘅宗教活動。嗰位師母就勸佢教會嘅會友，唔應該再去參加嗰啲民間信仰嘅活動；但係佢嘅會友回應佢話：「除非，你創立一個基督教嘅運動團體，我就唔再去。」
吳美雲聽咗教會師母講嘅嘢之後，亦都覺得自己呢三個月以嚟所參加嘅運動團體，多數都係其他宗教嘅運動團體。因此吳美雲就向神祈禱話：「神阿！求祢畀我自己創作一個屬於祢嘅運動團體。」就係噉樣，吳美雲開始用聖經嘅話語寫成詩歌、設計動作，創作出一套能夠既可以做運動、亦可以敬拜神嘅讚美操[1]。
讚美操嘅創立[編輯]
讚美操喺2003年由吳美雲老師創立，佢負責作曲同編舞，每首詩歌長三至五分鐘。讚美操為宣揚基督福音，為培養個人靈命增強體能，提昇身、心、靈健康，關懷社區人群，以聖經嘅話語，創作出好多旋律優美而且容易上口嘅經文詩歌來做體操，操中有舞，舞中有操。老少咸宜嘅感恩、喜樂讚美操。
讚美操嘅設計係結合優雅嘅舞蹈同呼吸配合各式健身運動，令到全身嘅筋骨舒展，每日靈修、敬拜、讚美、禱告，以神嘅話語來潔淨心靈，以優美嘅旋律來提昇氣質，以優雅嘅肢體運動來保持健康，亦可以藉住讚美操嘅分享，增強人際互動之間嘅良好關係，提昇年長者嘅生活品質。
