唱針

唱針

唱針（英文：stylus，俗稱 needle）係唱頭實際同黑膠碟接觸嘅部分。通常係鑽石造，亦有細粒鑽石粢喺鋼針上面。唱針有唔同形狀，主要分圓形、橢圓形同超橢圓三大類。

物料

早喺1990年代，大部分唱針已經係鑽石造，到而今都仲係，原因係佢夠硬同可以打磨到唔會太刮啲碟，另外亦都有藍寶石同瓷質造，但係冇咁禁；以前用過第啲材料，包括鋼、木、竹同膠等等，而今都已經冇用。鑽石造嘅唱針可以係全粒鑽石，或者係細粒鑽石粢喺鋼針上面，粢鋼針係為咗減低成本，但係咁樣整出來嘅唱針會重過全粒鑽石。

形狀

唱針嘅針尖部分有唔同形狀，主要分圓形、橢圓形同超橢圓三大類；超橢圓基本上即係真係尖嘅，但係其實最尖嘅部分仍然係圓圓地，即係其實佢最尖嘅部分都係圓嘅，不過半徑好細，超橢圓可以再細分做線接觸（line contact）、微線形（micro­linear，又叫鴨咀針，micro-ridge）、柴田唱針（Shibata）等等。圓形、橢圓形同超橢圓係指針尖橫切面嘅形狀，即係話例如我哋講嘅所謂圓形其實係指類似半球體嘅立體。

圓形係最舊嘅設計，唔好處係爾種唱針喺唱片嘅坑紋入面其實淨係會掂住兩點，後來有咗立體聲之後發現圓形唱針喺分返開兩條聲道嗰陣唔係好理想，所以發明咗橢圓形。再後來發明尖嘅針，係為咗同唱片上面嘅紋接觸得再好啲，尤其係當係高音嗰陣，尖嘅唱針其實唔係好似針咁尖成一點，而係尖成一條線。

微線形嘅鴨咀針已經好少人用，最初啱啱發明嗰陣，曾經被認為係非常好嘅高科技設計，但係個鴨咀形喺用咗好耐之後仍然會磨損到冇咗，音質就會突然變差，仲會刮碟。

雖然話圓形針尖處理立體聲唔理想，但係喺 DJ 界常用，如果唔係就一定要係橢圓形，因為捽碟嗰陣，如果支針真係尖嘅就會刮花張碟。