國際表意文字核心
國際表意文字核心（International Ideographs Core，簡稱IICore或者易擴）係目前漢字編碼嘅最細標準。佢總共收錄咗東亞地區大約一萬個常用字，包括東亞地區各個國家同埋地區嘅第一常用字平面。呢一萬字嘅組合如下：
- 中國大陸（6944字）
- 臺灣（6608字）
- 香港（5139字）
- 澳門（4960字）
- 日本（4593字）
- 南韓（4759字）
- 北韓（4653字）
- 其他被收入Unicode嘅字（7772字）
呢一萬個字所包含嘅，唔單單限於中日韓統一表意文字基本字面嘅漢字。當中有42個字位於擴展區A、62個字位於擴展區B。
歷史
[編輯]國際表意文字核心係中日韓統一表意文字嘅基本子集，由Unicode嘅表意文字小組接納。首先係喺2003年11月17日至11月20日桂林召開嘅IRG第21會議入面提出，再喺2004年5月四川省成都市舉行嘅第22次會議通過。
易擴推出嘅目的，主要係畀啲硬件上唔能夠容納成個中日韓統一表意文字嘅方案。現時中日韓統一表意文字嘅基本字集部份，就已經有二萬幾字。不過，各個地區嘅常用字，哪怕係字數最多嘅臺灣，都淨係得一萬三千幾字。所以，要包含一個字數咁龐大嘅字集，會對硬件設計造成壓力。而家中、港兩地嘅繁簡通電話，都係用大陸嘅國家標準代碼標準字集，咁會令到繁體字使用者有時唔可以喺手機輸入一啲常用字（例如：「咩」、「睇」等），易擴嘅出現，正好可以解決呢個問題。
擴展區漢字
[編輯]由於有啲流動裝置，因爲採用編碼或者字型格式問題，往往淨係支援基本區漢字，或者淨係支援到擴展區A，擴展區B開始嘅「四字節區域」就唔支持。結果，位於「四字節區域」嘅漢字往往成爲急用字。例如「𨋢」字對香港人嚟講極爲常用，但係佢喺擴展區B，唔少裝置仍然未支援，令到好多人都仲係難以使用呢個字。
喺擴展區A嘅核心漢字
[編輯]共42字，包括：
- 㓤 㕷 㖡 㖭 㖿 㗎 㗳 㗾 㥠 㧟 㧸 㧾 㨘 㩒 㩧 㬹 㭎 㷧 㷫 㹴 㻐 䁥 䁪 䂻 䃟 䄷 䓪 䘆 䜣 䟴 䢵 䢼 䣅 䣓 䧑 䨒 䪸 䱽 䲁 䲅 䲳 䴈
喺擴展區B嘅核心漢字
[編輯]共62字，包括：
- 𠜎 𠜱 𠝹 𠱓 𠱸 𠲖 𠳏 𠳕 𠴕 𠵼 𠵿 𠸎 𠸏 𠹷 𠺝 𠺢 𠻗 𠻹 𠻺 𠼭 𠼮 𠽌 𠾴 𠾼 𠿪 𡁜 𡁯 𡁵 𡁶 𡁻 𡃁 𡃉 𡇙 𢃇 𢞵 𢫕 𢭃 𢯊 𢱑 𢱕 𢳂 𢴈 𢵌 𢵧 𢺳 𣲷 𤓓 𤶸 𤷪 𥄫 𦉘 𦟌 𦧲 𦧺 𧨾 𨅝 𨈇 𨋢 𨳊 𨳍 𨳒 𩶘