基督教榕樹頭之光協會
基督教榕樹頭之光協會（英文：Light of Yung Shu Tau Christian Society，簡稱榕光），係香港一個基督教社會服務機構，服務生活上同心靈上有需要嘅基層群體，包括獨居長者、單親家庭、新來港危機家庭等。
簡介
[編輯]「基督教榕樹頭之光協會」原名「基督教榕樹頭之光教會」，係一間基層教會，喺1988年1月7號創立。最初中國神學研究院「基福課程」六位神學生喺油麻地榕樹頭公園佈道，進行探訪，開設查經班同團契。1988年3月舉行第一次崇拜，1990年5月擴展到深水埗楓樹街公園佈道，成立據點到而家。1993年至1997年期間開辦「常樂及祈樂臨時男子宿舍」。2000年1月再開展通州街公園佈道事工。
喺1995年12月12號由社團註冊改為有限公司註冊，全名改為「基督教榕樹頭之光協會有限公司」。雖然個名叫做協會，不過仍然會舉辦：團契、小組、崇拜、佈道、關懷、服務等，實行身兼教會、機構同宣教嘅責任。
會友大部份係貧窮人，所以協會喺經濟上未能夠自立。喺油麻地同深水埗兩區都有小組同崇拜，接觸到嘅都係基層人士，包括：獨居老人、露宿者、道友、弱智人士、精神病康復者、新來港人士等。
事工同服務
[編輯]探訪
[編輯]有啲老人家好耐都冇人探佢哋，榕樹頭之光嘅同工或義工會去醫院或床位探望佢哋，安慰佢哋，亦藉此鼓勵佢哋認識信仰。
「新來港危機家庭」緊急援助服務
[編輯]榕樹頭之光自99年中開始接觸好多稱之為「新來港危機家庭」嘅個案，例如持雙程証（部份或持單程証）嘅婦女，帶埋有單程証年紀細嘅仔女嚟到香港之後，因為種種原因而搵唔到親人，喺投靠無門之下，生活陷入絕境。榕樹頭之光就喺1999年中開展「新來港危機家庭」緊急援助服務。基於資源所限，只能夠選取部份個案提供服務。
神愛之家（緊急援助宿舍）
[編輯]榕樹頭之光喺2000年9月開辦呢種宿舍，為喺危機中嘅孤兒寡婦提供臨時住宿服務，幫助佢哋渡過難關。「神愛之家」宿舍服務咗11年，截至2012年1月，受惠家庭有234個，但由於缺乏基金運作而停辦，2012年1月31號呢項服務正式完滿結束。雖然宿舍停辦，榕樹頭之光仍然關心危機家庭需要同支援。
鄰舍關懷服務
[編輯]- 小學生功課輔導班
- 學生文具贈送計劃
- 愛心糧倉
