報復性罷免

喺台灣，近年有一啲泛綠人士，因為某啲原因而遭到一啲唔支持佢哋嘅人根據《公職人員選舉罷免法》針對，發起罷免程序。好多時候呢啲罷免案都得到國民黨嘅支持，而部分泛綠陣營嘅人士就形容呢啲罷免案係報復性罷免。

背後動機

有民進黨人士認為，國民黨持續透過報復性罷免激化政治對立。而喺黃捷罷免案入面，有人用黃捷聲援香港民眾違反未經香港人同意由北京等方面要求訂立嘅《香港國安法》為理由，用北京嘅標準審查台灣民意代表嘅言論，顯示罷免黃捷嘅理由牽強荒謬。

另外，東海大學政治學系教授沈有忠亦曾經發表文章，話呢啲針對泛綠陣營嘅罷免案，好大程度係因為泛藍同韓國瑜嘅支持者，喺韓國瑜遭到罷免後而發起，做法突顯台灣政黨惡鬥同埋排名制度嘅漏洞。佢又話，針對王浩宇嘅罷免案係同王浩宇嘅爭議言論有關，而針對韓國瑜嘅，主要係因為佢放棄市政。

身為罷韓四君子、台灣基進新聞部主任嘅張博洋喺2021年嘅時候曾經就話，從王浩宇、黃捷到陳柏惟等罷免案，其實係國民黨針對細黨嘅狩獵、狙擊行動，久而久之呢啲選區嘅多元聲音就會被扼殺，咁樣絕對唔係市民之福。

被部分意見視為報復性罷免案嘅例子

• 2021年桃園市第七選舉區市議員王浩宇罷免案
• 2021年高雄市第九選舉區市議員黃捷罷免案
• 2021年臺中市第二選舉區立法委員陳柏惟罷免案
• 2022年林昶佐罷免案

外間評論

• 《自由時報》喺陳柏惟罷免案被通過之後，形容陳柏惟係因為鮮明對抗中共嘅立場成為藍營同親中勢力嘅眼中釘，而罷免案嘅機制已經成為中共對台灣進行統戰嘅手段。