墨斗

墨斗係起嘢用嘅架生。佢用來幫工地畫直綫。墨斗結構好簡單，只係一塊四方木，上面挖空，等變成個斗裝墨。墨可以係墨粉或者墨水。斗中間有個綫轆，可以拉一條綫出來。

墨斗傳說係魯人公輸班，即係魯班師傅，整出來嘅。

用嗰陣就將墨倒入個斗裏面，綫轆啲綫吸墨。呢個時候要有兩個人做，一個揸住墨斗，另一個將黐晒墨嘅綫拉出來。拉出來彈一下先，fing走多餘嘅墨，然後兩個人行埋去要彈墨綫嘅地方，對準彈落去，咁就有一條綫響啲嘢上面喇。

通常響地盤做測量，度平水嘅人都會用墨斗，所以呢行嘅人亦都叫墨斗。

借喻

廣東話有句黑過墨斗，黑指行衰運。墨斗因為多墨，係好黑。黑過墨斗就係話，凡事頭頭撞着黑。