大別山

大別山（粵拼：daai6 bit6 saan1）係中國中部嘅主要山脈。西段西北-東南走向、東端東北-西南走向，係淮河同長江嘅主分水嶺。大別山係湖北北部同河南嘅省界，亦係湖北東部同安徽嘅省界。

大別山東高西低，西段平均300~400米高，都有啲山峰900米高；東段平均1000米高。最高峰係霍山嘅白馬尖，海拔1777米。（因為霍山係東延，所以有時定天堂寨做主峰，海拔1739米。）

概況

大別山大部分係森林，森林覆蓋率達85%，呢度橡木好多，係中國橡木主產地。呢一帶都比較窮，農業上以稻、茶為主，同時都有毛竹、軟木嘅林業。

穿過大別山嘅主要交通孔道係湖北麻城同河南潢川之間嘅淮河溪谷。武漢北行嘅主要鐵路、公路都揀行地勢和緩無咁高嘅地方。