大包

出自維基百科,自由嘅百科全書
Jump to navigation Jump to search
大包

大包全稱雞球大包,係點心嘅一種。用低筋麵粉加上澄麵做皮,以豬肉、雞蛋、雞肉、冬菇、鮮筍(或沙葛)等作主要餡料,將釀好餡料嘅大包蒸製而成。大包貌似菜肉包,不過造型龐大,大概係一般中式包類體積嘅3倍左右,通常一個普通嘅蒸籠只可以放入一隻大包。

大包源自廣州茶樓提供嘅點心之一。由於大包體積大、餡料多,令食客可以飽肚。茶樓通常對大包嘅規格、質量、定價經過精心計算,以免做蝕本生意。「賣大包」一詞亦因而成為廣東流行語,意思係以廉價招徠。一般賣大包有兩種做法:

  • 按成本賣、唔賺錢。
  • 以賠上茶價收益賣。

有啲茶樓為此限制賣大包嘅數量,例如每日茶市限賣一次,有啲兩次,或者限制每位茶客只可以買一個大包。無論大包「超值好食」,但以往茶客都守規矩,一般唔會走去搶包。

因為茶樓文化由廣州傳至香港,喺20世紀戰前香港嘅茶樓都有賣大包。之後香港經濟起飛,茶樓點心嘅種類愈來愈多樣化,香港茶客嘅選擇多咗,對大包嘅喜愛程度逐漸減少,加上食客嘅食量減少,同大包嘅製作成本較高、工序較多,新式茶樓通常都無大包賣。家陣喺香港只有一啲懷舊式老茶樓好似得如茶樓有大包賣。

喺越南粵式大包直到現時仍然流行,喺粵式茶樓或大街小巷周圍食到,餡料多數用豬肉、沙葛、鵪鶉蛋、臘腸等等做成,越南話叫賓(爆)包。