大話骰

玩大話骰就要用到骰仔同骰盅

大話骰（粵拼：daai6 waa6 sik1）係種用到骰仔同骰盅去玩嘅猜枚遊戲，適合一大班人一齊玩。

玩法係一人有五粒骰仔同一個骰盅，先搖骰盅，睇下自己每粒骰仔嘅點數，之後大家輪流估所有玩家加埋有幾多粒相同點數嘅骰仔，格式係「X個Y」，其中X代表幾多粒骰，第一次叫最少等如玩家人數，Y代表點數，第一次叫一般最細係2，因為1點係百搭，即係無論2到6點都要計埋1點嘅骰。

第一位玩家估完之後，跟住嘅玩家可以揀信定唔信：如果信，就繼續叫骰，但要加大骰仔數量或者點數（可以兩樣都加大），等再下一位玩家決定信唔信；如果唔信，所有玩家就要打開骰盅，如果揭發上一位玩家講大話，上一位玩家就輸咗一鋪，相反就唔信人嗰位玩家輸咗一鋪。