天津史

1900年天津明信片，當時拼「Tientsin」

天津史最早可以追溯到新石器時代，嗰時天津郊區（今日寶坻區、靜海區一帶）已經有人住，唐朝同宋朝嗰時已經係重要嘅軍港，明朝永樂年間正式起咗天津衞，並由朱棣用「天子津渡」意思賜名天津，之前天津叫過做軍糧城同直沽。天津嘅老移民多數係出身自安徽、江蘇同浙江，其餘為兩湖人士同全國其他地方，開埠後由於經濟迅速增長同埋華北地區發生咗蝗災嘅原因，大量華北人湧入天津不過天津嘅文化體系已經形成所以佢哋未能同化當地文化。自從1860年因為大清打輸第二次鴉片戰爭而被逼將天津開放為通商口岸之後，西方多國都喺天津設立租界，亦成為中國洋務運動嘅基地，逐漸發展做華北地區重要工商業城市，巔峰時期係僅次於上海嘅亞太第二大城市。到中華民國時期，天津喺1930年到1935年做過河北省會，其餘時間都係直轄市，到中共執政後依然係直轄市。