天祥徐公祠

出自維基百科,自由嘅百科全書
跳去: 定向搵嘢

座標: 23°6′4.7″N 113°22′32″E / 23.101306°N 113.37556°E / 23.101306; 113.37556

天祥徐公祠
世德堂
Sai Dak Hall of Tsui Clan.jpg
主祀 天祥公
家族信息
家族 琶洲徐氏
修建史
始建 1809年
重修 1990年代
重建 1882年
2014年
方位
地址 廣州市海珠區琶洲村啟明大街11號
朝向 坐南朝北
現時尚存
無保護級

 天祥徐公祠粵拼tin1 coeng4 ceoi4 gung1 ci4 ,堂號世德sai3 dak1),原先喺廣州海珠區琶洲村啟明大街11號,係一間坐南朝北嘅清朝祠堂,重係琶洲華僑港澳同胞同鄉聯誼會會所。祠堂廣三路,深三進,總面闊30.28米,總進深72.28米,佔地面積2188.64平方米[1]2010年,琶洲村拆遷,祠堂要響第處重建。2014年11月27號,復建嘅祠堂落成,搞重光慶典[2]2015年7月28號凌晨,祠堂第二沓冧咗[3]

建築[編輯]

成座建築有九十九道門,裝飾精美,係徐姓族人聚議場所。

門前嘅地堂闊30.28米,深15.7米。花崗條石鋪地。蓮塘五百個方。地堂東門花崗石門額刻住「風流溯鳳」 ,另一面刻嘅係「初涌曉日」 ;西門花崗石門額「指日登鰲」,背面係「遠接長江」。祠堂两边有青雲巷。

頭門面闊三間,進深三沓。硬山頂,「人」字封火牆,灰塑龍船脊,碌筒素瓦。水磨青磚牆花崗石腳。前廊樑架木雕瑞獸駝峰,龍頭雀替。墀頭磚雕。前檐棟四碌花崗石柱。木門額寫「天祥徐公祠」,匾隔籬兩邊係大幅彩色木雕畫,匾頂有木雕通花圖案裝飾。大門彩繪門神。次間砌花崗石包臺,上面放蝦公樑。木雕封檐板。花崗條石鋪地。門前有六個花崗石級。

第二進前邊天井用花崗條石鋪地。兩個廊面闊三間。硬山頂,灰塑博古脊。紅階磚鋪地。

第二進中堂面闊三間,進深四間。卷棚頂,碌筒素瓦。雀替木雕怪獸圖案。蝦公樑上高有石獅同變形斗栱,雀替都係花崗石雕。前後檐柱係花崗石方柱。金柱直徑50公分。門前邊六個花崗石級,有左右石獅。大廳東西開八角門,門額分別係「止肅」同「來雍」。

後天井進深5.4米。花崗條石鋪地。左右偏廊面闊二間。硬山頂。紅階磚鋪地。

第三進後堂面闊三間,進深三間。硬山頂,碌筒素瓦。神檯放正中間。左邊牆鑲塊石碑,碑文係《重建世德堂碑記》,落款「光緒八年歲次壬午立」,長1.49米,闊0.76米。右邊牆掛民國時期廣東省省長徐紹楨1孫文嘅合影。

襯祠面闊三間。天井脊、瓦、柱、樑飾嘅圖案同正堂一樣。花崗條石鋪地[1]

祠堂有兩座後樓,分別係魁星樓同觀海樓。魁星樓係愛來放徐氏族譜同其它珍貴資料嘅地方;觀海樓係徐氏宗族長老開會嘅地方[4]

歷史[編輯]

舊祠[編輯]

清朝嘉慶十四年(1809年),琶洲徐氏子孫出錢起祠堂祭拜天祥公,由天祥公外孫李宗翰2題寫祠堂匾額[4]光緒八年(1882年),祠堂重建。民國時期,祠堂做過天祥小學,後尾改名叫琶洲村小學。二十世紀九十年代,祠堂維修,部分瓦面、柱、地面同襯祠用瓷磚嚟鋪,嗰時,頭門條柱上邊有副對聯:「鳳舞龍飛喜看大好河山生機無限 雲蒸霞蔚遙望同胞骨肉團聚有期」。2010年,琶洲搞拆遷,當時村有兩間徐氏祠堂:徐氏宗祠、天祥徐公祠。因為淨可以復建一座,徐氏族人就揀咗天祥徐公祠,淨留低咗「徐氏宗祠」匾額,放響新祠堂附近一間屋[4]

新祠[編輯]

祠堂復建按返原先嘅樣,坐南朝北,總平面係長方形,建築面積就縮水到1700平方米,比起原先細咗一半。祠堂「修舊如舊」,部分材料用嘅係舊祠堂拆落嚟啲磚。成個復建過程由琶洲村民親自監督,有關嘅建築材料都係根據村入邊嘅風俗文化同村民嘅要求,邊起邊調整。

2014年11月27號,新祠堂喺琶洲回遷安置區落成,徐氏族人又舞龍又舞獅噉搞祠堂重光慶典,喺祠堂擺咗幾百圍[2]

就喺新祠堂起好半年幾之後,2015年7月28號凌晨十二點(又有人話係一點幾),天祥徐公祠嘅第二進突然間冧咗,屋頂、橫樑同立柱冧嗮,冧嗰時好大聲,吵醒咗附近居民[3]

註腳[編輯]

  • 註 1: 徐紹楨,字固卿,喺琶洲村出世,做過廣州衛戍總司令、廣東省省長、臨時參政院參政。
  • 註 2: 李宗翰,字北溟,清乾隆五十八年(1793年)進士、詰授中憲大夫翰林院侍讀學士提督湖南學政。

[編輯]

  1. 1.0 1.1 陳建華 等, 編 (2008). 廣州市文物普查彙編·海珠區卷. 廣州: 廣州出版社. 第 第96頁頁. ISBN 978-7-80731-659-6. 
  2. 2.0 2.1 "琶洲徐氏祠堂「重光」啟用". 南方都市報. 網易新聞. 2014年11月28號. 喺2015年7月29號搵到. 
  3. 3.0 3.1 "徐氏祠堂 凌晨坍塌". 廣州日報. 大洋網. 2015年7月28號. 喺2015年7月29號搵到. 
  4. 4.0 4.1 4.2 鍾暉 等, 編 (2014). 海珠古祠堂. 廣州: 廣東教育出版社. 第 第215–216頁頁. ISBN 978-7-5548-0235-9.