太原奇案

出自維基百科,自由嘅百科全書
Jump to navigation Jump to search

太原奇案係發生喺清末太原一單案,話說喺太原個有錢佬叫張百萬,本來佢個二女玉珠要嫁畀曹文璜,但由於曹文璜家道中落,張百萬就睇唔起佢,於是將個二女許配畀一個姓姚嘅有錢人家,但係玉珠鍾意曹文璜唔鍾意錢,於是同曹文璜私奔,走咗去投靠交城縣令嘅一個舊老友陳砥節,途中去咗間豆腐鋪,豆腐鋪老闆莫老漢同情佢哋,於是就借咗隻毛驢畀佢哋走。

張百萬發現唔見咗個二女,就以為佢去咗大女金珠嗰度,去到金珠屋企,諗住玉珠喱咗喺個衣櫃入面,於是將個衣櫃抬走,但估唔到個衣櫃入面有個和尚,個和尚焗暈咗,張百萬擺烏龍,以為個和尚死咗,於是幫個和尚換咗佢二女啲衫,話係佢個二女病死咗,之後將個和尚放入靈堂。

個和尚後尾醒返,偷偷地走咗,佢又去咗莫老漢間豆腐鋪度,佢喺嗰度換返啲普通衫。原來呢個和尚係個咸濕佬,佢後尾見到靚女於是走去撩,點知個靚女有個老公同佢一齊,佢老公吳屠戶就一時火起將個和尚殺死咗,然後將條屍掟咗落個井入面。

張百萬靈堂走屍,加上和尚命案,一時間傳到人人都知,變到好大件事。陽曲縣令楊重民於是開堂公審,聽到有人話和尚著住件衫原本係豆腐鋪個莫老漢,因為單嘢好轟動,楊重民因為心急結案,求其審一審就話莫老漢係凶手,仲屈打成招,上報咗去刑部就結案。

至於真正個凶手吳屠戶,佢喺殺死個和尚之後,諗住搬去晉祠住,途中喺酒店撞到曹文璜,吳屠戶飲大兩杯,就爆咗佢係殺死個和尚個凶手。

曹文璜返到太原,諗住還返隻驢畀豆腐鋪老闆莫老漢,知道佢畀人告謀殺,佢因為知情,諗住同莫老漢申冤,點知縣令楊重民知道自己判錯案之後,唔衰得,於是屈埋曹文璜係幫凶。

玉珠丫環秀香喺探監嗰陣知道單嘢係點之後,於是佢就趕返去交城搵玉珠,點知咁啱玉珠投靠嗰個陳砥節升咗做山西提刑按察司,於是成單嘢終於真相大白。

呢單嘢曲折離奇,後人將呢單嘢列入清末四大奇案之一。

參考[編輯]

[編輯]