太監

  呢篇文講官名。想搵宮廷入面任職嘅閹人嘅話，請睇宦官。

太監係中國古代官名（成日同「大監」混淆，但兩者係唔同意思），最早出現喺北魏，係作為女官稱號。唐朝嗰時係外朝官職大監嘅別稱。宋朝係高級女官職稱，遼朝係政府高級職位嘅名。到咗明朝時，由於太監職位成日都係由宦官擔任，於是「太監」就變咗高級宦官嘅稱呼，到清朝，宦官全部都叫做太監，之後先變成宦官統稱。1912年清朝覆滅之後太監先開始消失。

歷史

太監呢個名係喺北魏開始出現，孝文帝置女官管理內事，其中就有「大監」一職，喺作司之下，女侍中之上，而古人又成日將「大」與「太」撈亂用，所以「大監」可能就係太監，例如喺北齊，宮女出身嘅穆黃花（字舍利）畀北齊後主高緯臨幸之後就畀人叫做「舍利太監」。

唐代外朝官職中有大監，亦都寫做太監。

「太監」作為正式官名嘅記載係喺宋代，孫逢吉嘅《職官分紀》記載，宋太宗喺內廷置內官（女官），有尚宮同太監，一齊負責內省事務，又改內省為做尚書內省，尚書、太監都叫尚書。呢度嘅太監係高級女官職稱，亦寫成大監。亦都有其他官署設有太監官職。

喺遼代，太監係南面官入面嘅太府監、少府監、秘書監、將作監、都水監等等官署嘅主官，下面有少監、監丞。

喺元代，藝文監、典用監、典醫監、典牧監、甄用監、太府監、度支監、利用監、中尚監、章佩監、經正監、秘書監等等嘅官署都設有太監官職，地位低過位次各監嘅卿或者太卿。

明代宮中設二十四衙門，入面設有十二監、四司、八局，每一個都專設一個掌印太監負責提領，其中十二監中嘅內官監、御用監、四司、八局、內府供用庫、提督東廠等，每一個都設一個掌印太監。部份機構例如司禮監除咗掌印太監之外，重有提督太監、秉筆太監、隨堂太監；提督京營除咗掌印太監之外重有坐營太监。由於呢啲太監成日由宦官出任，於是後來「太監」就變咗高級宦官嘅稱呼。但係明代並無規定太監職位一定要由宦官出任。

到清朝，宦官全部都叫太監，太監一詞先完全等如宦官。