跳去內容

威悉演習行動

出自維基百科,自由嘅百科全書
北歐戰役
第二次世界大戰西方戰線嘅一部分
日期: 1940年4月9號—1940年6月9號
地點: 挪威、丹麥
結果: 德軍贏咗,佔領咗挪威同丹麥
參戰方
英國
法蘭西第三共和國
丹麥
挪威
波蘭流亡政府
納粹德國
指揮官同領導者
哈康七世
約翰·尼高斯沃爾
克里斯蒂安·拉克(英文:Kristian Laake)
奧圖·魯格(英文:Otto Ruge)
卡爾·古斯塔夫·弗萊舍爾(英文:Carl Gustav Fleischer)
基斯頓十世
索瓦爾德·斯陶寧
艾德里安·卡頓·德·維亞爾(英文:Adrian Carton de Wiart)
皮里斯·祖斯·麥克西
尼古拉斯·馮·法爾肯霍特(英文:Nikolaus von Falkenhorst)
漢斯·斐迪南·蓋斯勒(英文:Hans Ferdinand Geisler)
君特·呂特晏斯
兵力
挪威:
60,000人—65,000人
120,000人
傷亡同損失
英國1,869人
挪威1,335人
法國同波蘭530人
丹麥17人
1,317人陣亡
2,375人失蹤
1,604人負傷

威悉演習行動係納粹德國喺第二次世界大戰嘅時候向挪威同丹麥發起嘅襲擊行動,德軍代號係威悉演習作戰(德文:Weserübung),意思係「威悉河演習」。

納粹德國喺1940年4月9號喺當地時間4點15分偷襲挪威同丹麥,德軍宣稱係為咗要從英法手中保護兩國嘅中立。

軍事同埋政治背景

[編輯]
鐵礦喺基律納同Malmberget開採之後經過鐵路運到納爾維克同呂勒奧嘅港口(圖係1920年—1940年嘅國境)

從1939年春天開始,英國海軍總部就將斯堪的納維亞計劃同德國開戰嘅潛在戰區,英國政府唔肯再喺大陸上開戰,覺得會重蹈一戰嘅覆徹,所以開始考慮用封鎖戰術間接削弱德國,德國工業好依賴嚟自瑞典嘅鐵礦,呢啲鐵礦主要由挪威納爾維克港同瑞典呂勒奧運過嚟,納爾維克港冬天唔會結冰,所以全年都可以供應鐵礦。

1939年10月德國海軍總司令埃里希·雷德爾上將同希特拉討論如果挪威出現英國基地嘅危險同埋要趕喺英國之前搶呢啲基地嘅可能性,德國海軍覺得攞到挪威除咗可以控制附近嘅海域,仲可以作為未來對英國作戰嘅基地,不過因為當時陸軍同空軍冇興趣,所以希特拉只係表示將作戰重心集中喺低地國家。

11月底英國戰爭內閣嘅新成員溫斯頓·邱吉爾提議喺挪威海域鋪水雷,可以迫啲運礦船行去北海,英國皇家海軍就可以截住啲運礦船,不過呢個提案俾鴿派張伯倫同哈利法克斯否決咗,因為驚中立國家例如美國嘅負面反應。1939年11月蘇聯同芬蘭嘅冬季戰爭爆發咗,因為外交環境變咗,邱吉爾再一次提出佢嘅計畫,但都係俾人否決。

12月英國同法國開始計畫援助芬蘭,佢哋計畫將部隊登陸喺挪威嘅納爾維克,然後穿過瑞典再到芬蘭,盟軍可以佔領瑞典嘅鐵礦區,呢個計畫有張伯倫同哈利法克斯嘅支持,佢哋希望可以攞到挪威嘅合作,咁就可以解決一啲法律問題,但係向挪威同瑞典發出嘅嚴厲通告只係得負面反應,雖然遠征計畫繼續進行,但係因為芬蘭喺3月求和令到理由消失。

計劃階段

[編輯]

1939年12月14號,喺相信盟軍可能威脅鐵礦嘅來源之後,希特拉下令國防軍最高統帥部草擬入侵挪威嘅計劃,呢個草擬計劃只係預計投入1個師嘅兵力。

1月14號到19號德國海軍研究出草擬計劃嘅加強版。佢哋決定有2個關鍵要素,第1係偷襲,減少挪威嘅抵抗同英國嘅干預,第2係用軍艦而唔係比較慢嘅商船運送部隊,咁樣嘅話同時佔領全部嘅目標變成可能,因為運輸船有航程限制。新計劃會投入1個軍的兵力,包括1個山地師、1個空降師,1個摩托化步兵旅同2個步兵師,呢啲部隊嘅任務目標係:

呢個計劃都要求快速捕獲丹麥同挪威嘅國王,希望可以快啲迫對方投降。

1940年2月21號,行動指揮權交咗畀尼古拉斯·馮·法爾肯霍特將軍(Nikolaus von Falkenhorst),佢喺一戰嘅時候曾經喺芬蘭打過仗,所以好熟悉極地作戰,不過佢得地面部隊嘅指揮權,雖然希特拉希望佢可以將指揮權統一。

1940年1月27號,計劃最終改名成威瑟堡(Weserübung),由德國第21軍去領軍,其中包含德軍第3山地師同另外5個步兵師,其中嘅步兵師全部人都未打過仗。計劃嘅第1梯隊包含3個師,淨低嘅留返第2波,有3個傘兵連用喺佔領機場,德軍第2山地師之後都加入咗作戰。

原本嘅計劃係入侵挪威同埋以外交手段去攞到丹麥機場,但係希特拉喺3月1號指示兩者都要入侵,咁係因為德國空軍以防空預警嘅理由而要求佔領戰鬥機基地,為咗入侵丹麥而編嘅第16軍,包含2個步兵師同第11摩托化步兵旅,成個行動由空軍第10軍去支援,呢個軍用咗大約一千架各式飛機組成。

前奏

[編輯]

2月16日英國嘅哥薩克號驅逐艦(HMS Cossack)違反挪威中立咁喺挪威領海登上同樣違反挪威中立嘅德國運輸艦阿爾特馬克號(Altmark),釋放咗300個英國戰俘,希特拉覺得呢個係英國有意違反挪威中立嘅明顯訊號,所以更加堅定咗侵略嘅決心。

3月12號喺冬季戰爭就嚟打完嘅時候,英國終於決定派遠征軍去挪威,遠征軍喺3月13號開始上船,但係因為冬季戰爭完咗所以折返而且行動取消咗,英國內閣決定開始喺挪威海域鋪水雷作為代替,然後再登陸。

4月8號,海軍大臣溫斯頓·邱吉爾宣布英國海軍要喺挪威海域鋪水雷,一隻英國驅逐艦都喺呢一日開始喺挪威海域鋪第1個水雷,而第1批德國侵略船團秘密咁喺4月3號出發,預計會喺4月9號執行作戰計畫,嗰日就係邱吉爾宣布鋪雷令嘅第2日。

結果喺外界睇來,德國對於英國鋪水雷計畫同埋破壞挪威中立嘅反應,都顯示出難以置信嘅迅速,呢個都俾德國當局當做係隔日出兵嘅理由。

入侵丹麥

[編輯]

德軍進攻丹麥嘅路線

1939年,德國同丹麥簽訂互不侵犯嘅和平條約。喺戰略上丹麥唔算重要,除咗可以作為對挪威作戰嘅集結區之外,冇乜意義。當然作為一個同德國接壤嘅國家,丹麥都係要俾德國打。呢個國家國好細同埋好平坦,係德國陸軍作戰嘅理想地點,丹麥嘅陸軍冇乜抵抗可能,丹麥士兵得14,000人左右,其中有8,000人係喺2月同3月嘅時候招返嚟,士兵訓練水準低下,幾乎冇裝甲部隊。

1940年4月9號5點德國空降兵喺冇人駐守嘅馬德尼索(Madneso)要塞同埋奧爾堡(Aalborg)機場空降,6點喺哥本哈根港口商船入面嘅德國步兵營發動攻擊,捕獲丹麥國王同王室成員,而德國第21軍嘅2個師都過埋國境入侵咗日德蘭半島。因為實力懸殊,丹麥軍隊除咗守衛喺哥本哈根嘅皇宮,同德軍短暫交戰之外,幾乎冇抵抗。9點20分喺幾個分隊嘅He 111轟炸機同Do 17轟炸機威脅轟炸哥本哈根平民嘅恐嚇之下,基斯頓十世即刻投降,換取對國內事務嘅自主權,當日德軍就佔領咗丹麥全境。跟住就係丹麥佔領時期,特別喺1943年夏天之前,同時延後咗對丹麥猶太人嘅逮捕同驅逐,佢哋幾乎全部都撤去瑞典。喺戰前估計嘅大約有8,000個丹麥猶太人入面,俾人驅逐嘅少過500人、死咗嘅唔夠50人。

雖然丹麥同埋其餘斯堪的納維亞國家大致上冇乜軍事實力,但係佢哋有戰略、經濟同思想方面嘅重要性,就好似第2位德國全權大使維爾納‧貝斯特博士(Werner Best)所講:「丹麥嘅農業提供咗好多經濟援助,亦係同瑞典嘅重要接口」。

入侵挪威

[編輯]
内文:挪威戰役

動機同戰鬥計畫

[編輯]

挪威對德國之所以咁重要有兩個主要原因:作為海軍單位嘅基地,可以騷擾盟軍北大西洋嘅航運,挪威北面嘅長海岸線係出動U艇攻擊英國北大西洋商船嘅極好位置,同埋確保從納爾維克運過嚟嘅瑞典鐵礦運輸順暢。

入侵挪威任務交咗畀尼古拉斯·馮·法爾肯霍特將軍(von Falkenhorst)嘅第21軍團負責,包含以下嘅主要部隊:

德軍第1階段登陸地點

德國入侵部隊分成唔同嘅船團運載:

  1. 戰鬥巡洋艦:沙恩霍斯特級戰鬥巡洋艦同埋格奈森瑙號戰鬥巡洋艦遠距離掩護,10隻驅逐艦同愛德華‧迪特爾(Eduard Dietl)將軍嘅2,000人山地部隊去納爾維克。
  2. 重巡洋艦:希佩爾海軍上將號重巡洋艦同4隻驅逐艦同登陸部隊1,700人去特朗赫姆。
  3. 輕巡洋艦:科隆號輕巡洋艦同柯尼斯堡號輕巡洋艦,炮術訓練艦制動器號訓練艦(英文:German training ship Bremse),運輸艦卡爾·彼得斯號,2隻魚雷艇、5隻摩托魚雷艇同登陸部隊1,900人去卑爾根。
  4. 輕巡洋艦:卡爾斯魯厄號輕巡洋艦,3隻魚雷艇、7隻摩托魚雷艇同登陸部隊1,100人去克里斯蒂安桑。
  5. 重巡洋艦:布呂歇爾號重巡洋艦號,重巡洋艦(前袖珍戰艦)吕措號,輕巡洋艦埃姆登號輕巡洋艦,3隻魚雷艇、8隻掃雷艦同登陸部隊2,000人去奧斯陸。
  6. 4隻掃雷艦同登陸部隊150人去艾格桑。

過程

[編輯]
奧斯陸峽灣同奧斯卡要塞
一門放喺奧斯卡博格要塞(書面挪威文:Oscarsborg festning)嘅280毫米砲,係其中一門擊沉咗德國重巡洋艦布呂歇爾號嘅大砲

1940年4月8號傍晚,挪威巡防艇Pol III(書面挪威文:HVB «Pol III»)號發現咗北上嘅德國第5戰鬥群,同德軍短暫接火之後俾人俘虜,佢嘅船長係挪威喺呢場戰爭嘅第一個犧牲者。

除咗奧斯陸同基世安利拿,全部德國船團喺預定時間之內完成咗登陸;喺基世安利拿,登陸部隊喺朝早10點先成功突破到岸防,比預定時間遲咗6個鐘。

1940年4月9號,德國第5戰鬥群以重巡洋艦布呂歇爾號為首沿住奧斯陸峽灣北上,喺5點15分接近峽灣最窄處嘅奧斯卡博格要塞(書面挪威文:Oscarsborg festning)嘅時候,布呂歇爾號俾島上已經有48年歷史嘅德國製克虜伯280毫米砲命中,之後機房又中咗2個40年前嘅魚雷,跟住失去控制,6點23分,布呂歇爾號翻覆沉沒,船上嘅2,202個船員同戰鬥人員入面有830個死咗,船團嘅其他船隻覺得以為係布呂歇爾號撞到水雷所以畀部隊提早上岸,所以奧斯陸喺清晨未受到攻擊。

呢個延誤令挪威皇室同國會有時間帶住國寶同黃金一齊走人。挪威從來冇向德國投降,而吉斯林(Vidkun Quisling)政府唔係合法地位。所以挪威唔屬於被征服國家,可以用盟軍嘅身份參戰。

威瑟演習作戰嘅其中一個重要部份係用傘兵去打奧斯陸同斯塔萬格附近嘅機場,呢個係歷史上第一次空降作戰,其中攻打奧斯陸福尼布(Fornebu)機場嘅計畫差啲變成德軍災難,第一批載住340個傘兵嘅29架Ju-52因為天氣唔好而折返,後續機隊都收到命令折返但係因為溝通唔到所以繼續向前飛,不過因為福尼布機場幾乎冇防禦,所以都係成功降落同佔領咗,隨住德軍不斷咁從機場過嚟,奧斯陸喺中午淪陷咗。

哈康七世同國會先德軍一步向北撤走,吉斯林成為咗歷史第一個用無線電宣告政變嘅人。

盟軍援軍部隊4月14號開始到達挪威,但係因為主要港口都喺德軍手上,重武器同後勤運送都好困難,不過盟軍成功攞返主要目標納爾維克,仲將港口整壞。

6月7號,哈康國王同國會逃到英國,成立咗流亡政府,6月9號盟軍最後喺納爾維克嘅部隊完成撤離。6月10號,挪威淪陷。呢一次作戰用咗德國2個月嘅時間,係二戰被德國陸軍侵略嘅國家入面撐得第2耐嘅國家,第1係蘇聯。