哈康七世

出自維基百科,自由嘅百科全書
跳去導覽 跳去搵嘢
哈康七世
King of Norway LOC 16735041091.jpg
挪威國王
在位1905年11月18號ー1957年9月21號
加冕1906年6月22號
前任奧斯卡二世
繼任奧拉夫五世

配偶威爾斯公主慕德
子嗣
家族格呂克斯堡王朝
父王費特力八世
母后路易絲公主
出世1872年8月3號
出世地丹麥 丹麥哥本哈根夏洛滕隆宮
1957年9月21號(1957-09-21)(85歲)
死地挪威 挪威奧斯陸王宮

哈康七世挪威文:Håkon,1872年8月3號1957年9月21號),全名挪威嘅哈康七世(挪威文:Håkon VII av Norge),係挪威獨立之後嘅第一位國王,1905年至1957年在任。

家族同早年[編輯]

卡爾王子,1883年攝

哈康七世原本叫基斯頓·費特力·卡爾·佐治·法德馬·阿䧘(丹麥文:Christian Frederik Carl Georg Valdemar Axel),1872年8月3號響哥本哈根夏洛滕隆宮出世,係時任丹麥王儲費特力王儲妃路易絲共同嘅第二個細路,上有一個大佬基斯頓。阿爺就係時任國王基斯頓九世;阿公同阿婆分別係瑞典國王卡爾十五世路易絲王后

同年9月7號,佢響夏洛滕隆宮舍蘭島大主教漢斯·拉臣·馬騰臣接受洗禮,同時亦獲得銜頭「丹麥嘅卡爾王子」,係根據佢阿公卡爾十五世嚟改嘅。

卡爾王子自細響王宮接受教育,亦響哥本哈根同埋屬於王室嘅唔同城堡入面同兄弟姐妹一齊大。

雖然佢淨係比大佬基斯頓細兩歲,但身為王儲嘅二仔,佢繼位做國王嘅可能性唔大。不過佢同大佬都響1887年響基斯頓堡宮接受堅信禮

佢由1889年去到1893年響丹麥王家海軍兵海校,畢業後做丹麥王家海軍嘅少尉,響1894年升為中尉。直至1905年佢都響海軍服役。

婚姻[編輯]

兩個人嘅婚禮

1896年7月22號,卡爾王子喺白金漢宮娶咗英國威爾斯親王愛德華(即後嚟嘅愛德華七世)個女威爾斯慕德公主。兩位新人其實係表姐弟關係:慕德嘅阿媽亞歷山卓親王妃,係丹麥國王基斯頓九世大女,亦係費特力八世(卡爾個老豆)嘅家姐。

愛德華親王之後送咗位於英國王室私人別墅山靜咸府嘅Appleton House畀兩公婆,方便個女成日返嚟英國嗰陣有地方住。

佢哋嘅獨生仔亞歷山大王子(即後嚟嘅奧拉夫五世)1903年7月2號喺英國Appleton House出世。

被選做國王[編輯]

哈康七世同老婆慕德嘅加冕照

1905年,瑞典-挪威聯合解體,挪威成功獨立。雖然挪威響1814年就有自己嘅法律、議會,算得上係半獨立;但自1397年起就冇一個屬於自己嘅國王。卡爾王子成為有力嘅國王候選人之一,因為佢幾個祖先都係挪威獨立嗰陣嘅國王;另外佢老婆慕德公主係英王愛德華七世個女,對啱獨立嘅挪威嚟講,無疑係爭取日不落帝國英國支持嘅最大後盾;再加上卡爾有個仔亞歷山大王子(即後嚟嘅奧拉夫五世),咁議會就唔使驚繼承人問題。

最後,挪威響同年嘅公投入面有79%嘅人都支持君主制,所以議會即刻擁立卡爾王子做新國王。而卡爾響搵一個啱心水嘅稱號嗰陣,並冇揀自己個名嚟做稱號,而係揀咗一個好有歷史嘅名ーー「哈康」。對上一位叫哈康嘅挪威國王已經係五百幾年前嘅事。

卡爾響11月18號帶住一家大細到基世安利拿(即依家嘅奧斯陸);第二年6月22號正式加冕做國王,係哈康七世

統治時期[編輯]

雖然哈康七世響憲法上有好大權力,但實際運作都係靠議會同首相,所以哈康其實冇乜權。佢將自己當係一位無黨籍人士,盡量唔搞政治。

1929年,阿仔奧拉夫同佢堂細妹瑪塔公主結婚。

1938年,慕德王后喺英國病逝。

二戰[編輯]

1939年,二戰爆發。1940年4月,納粹德國打住保持兩國中立嘅名,乘機想入侵丹麥同挪威,威悉演習行動開始。而德國之所以咁想打挪威有兩個原因:一係可以成為海軍嘅基地,既可以騷擾盟軍響北大西洋嘅航運,佢北面嘅長海岸線亦係攻擊英國商船嘅極好位置;另外就係納粹可以確保由納爾維克運過嚟嘅鐵礦可以好順暢咁到目的地。

4月9號,德國第5戰鬥群用重巡洋艦布呂歇爾號打頭陣,沿住奧斯陸峽灣北上。響5點15分行到峽灣最窄嘅奧斯卡博格要塞嗰陣,布呂歇爾號畀島上德國製嘅克虜伯280毫米砲命中,之後機房又中咗兩個魚雷,跟住失去控制,最終響6點23分沉沒,船上嘅2,202個船員同士兵有830個死咗。呢年事令到德軍其他船隻以為係布呂歇爾號撞到水雷所以畀部隊提早上岸,所以奧斯陸喺清晨暫時未受到攻擊,令到挪威政府有時間傾點樣應付。

同日下晝,政府好快就開咗內閣會議,最後決定將權力全權交畀內閣。

第二日,德國駐挪威大使卡特布魯爾(Curt Bräuer)同哈康見面,佢要求國王接受希特拉嘅建議,唔再作出抵抗,兼且任命同承認吉斯寧(Vidkun Quisling)係總理;而吉斯寧響幾個鐘頭之前就自行宣佈自己係總理,一個由德國操控嘅傀儡政權。布魯爾仲叫哈康,學佢大佬基斯頓十世咁即刻投降,去換取對國內事務嘅自主權,仲威脅話如果挪威唔投降,會遭到德國報復。哈康並冇應承,淨係話自己做唔到決定,只會跟內閣嘅建議再做下一步行動。

響之後嘅內閣會議上,哈康清楚表明自己嘅立場。佢話,佢唔可以接受德國嘅要求,亦唔會任命吉斯寧做總理;如果最後同政府嘅決定相反,佢會退位。

內閣受到國王嘅立場影響,即刻就叫國王唔使任命吉斯寧做總理。幾個鐘頭之後,內閣向德國發電報,決定拒絕德國提出嘅要求。而響廣播上,政府仲話會盡量抵抗德國嘅入侵。

流亡政府[編輯]

1940年4月,國王哈康七世(左)同阿仔奧拉夫王儲響度尋求庇護

4月11號,德國為咗令挪威徹底放棄掙扎同反抗,用空軍炸咗國王同內閣當時嘅所在地Nybergsund。哈康同內閣即刻決定要走人。雖然Nybergsund離瑞典邊境只有16米,但瑞典政府唔收留國王,仲話如果哈康一踏入瑞典國土就會拉咗佢;呢個決定令到哈康好嬲,亦一直都冇辦法原諒瑞典嘅做法。挪威王室同政府響一片雪嘅森林暫時避咗危險,之後出發到莫爾德。響嗰度佢畀英軍軍艦帶到特羅姆瑟,5月1號響當地建立臨時政府,期間王室成員響Målselvdalen一間森林小屋暫住。

盟軍都一直掌控住挪威北部嘅控制權,直至到響法國戰役期間打敗仗。當德國響入侵法國嘅一刻,打輸仗嘅盟軍決定撤出挪威北部,王室同政府響6月7號就坐軍艦 HMS Devonshire走人。最後哈康七世同其他人安全到咗英國,仲響倫敦成立流亡政府。

最初,哈康同阿仔奧拉夫都係白金漢宮嘅客人,響嗰度住。但隨住同年9月嘅倫敦大轟炸,佢哋搬到去柏莎郡嘅 Bowdown House。國王嘅官方住所係肯辛頓肯辛頓宮花園10號,亦係流亡政府嘅行政中心。響呢度,佢唔單止每個禮拜都參加內閣會議,仲定期接受英國廣播公司國際頻道嘅訪問。

同時之間,希特拉為咗盡快搞掂挪威,任命祖瑟夫特博文做挪威國家總督。響希特拉嘅指示下,特博文希望通過威脅議會嚟廢咗哈康七世。響議會唔聽佢支笛後,德國隨即落最後通碟,要脅如果哈康唔退位,就會將所有成年嘅挪威人關入集中營。議會聽到後即刻就嚇親,響6月27號寫信畀國王要求佢退位。而哈康知道後就話自己唔會退位,又話議會係畀人威脅嘅。當德國響9月希望迫議會廢咗國王但失敗之後,特博文宣佈王室一世人都唔可以返到自己國家,仲解散全部支持民主嘅黨。

1945年二戰完咗之後,哈康同王室成員響同年6月7號坐巡洋艦,喺民眾嘅一片歡呼聲入面返到奧斯陸。而奧拉夫王儲就早響5月13號返到嚟。

戰後[編輯]

1954年攝

1947年,挪威政府通過公眾認講,幫哈康買咗一艘王家遊艇Norge。

1952年,佢響出席佢老婆慕德個侄仔英王佐治六世嘅葬禮上,大聲咁喊。

1953年5月15號,佢長孫女拉格西爾公主嫁咗畀生意佬Erling Lorentzen,係第一位同平民結婚嘅挪威王室成員。哈康在生嘅時候睇到佢兩個太孫出世:哈康·洛倫臣(Haakon Lorentzen,1954年8月23號ー)同埋瑛格堡·洛倫臣(Ingeborg Lorentzen,1957年2月3號ー),都係由拉格茜爾公主生嘅。

王儲妃瑪塔(奧拉夫王儲個老婆)響1954年4月5號走咗。由於佢響老公未做國王前就去咗西天,所以佢做唔到王后。

1955年7月,哈康響Bygdøy Royal Estate嘅沖涼房入面跌親,啱啱好響佢八十四歲生日之前嘅一個月。呢次意外雖然並冇引起其他併發症,但都令到佢股骨骨折,要坐輪椅。一向好動嘅佢覺得自己好無助同埋唔開心,開始冇心機處理國事。1957年夏季,隨住佢嘅身體情況變差同埋已經行唔到路,王儲奧拉夫開始代父王出席公開活動。

哈康七世最終響1957年9月21號響奧斯陸王宮走咗,終年八十五歲,係費特力八世八個仔女入面最長命嘅。獨仔奧拉夫繼位做國王,係奧拉夫五世。而佢嘅屍體就響同年10月1號葬響阿克斯胡斯城堡,喺佢老婆個墳墓隔離。

影響[編輯]

哈康七世響挪威人嘅心目中印象唔錯,特別係佢響二戰個嗰陣堅決唔投降嘅行為。雖然佢都係走咗去英國成立流亡政府,但由於佢並未向德國投降,唔屬於被征服國家,所以令到挪威人民對國家嘅復辟留下希望;而哈康亦成為德國抵抗運動嘅精神領袖之一。百姓每當聽到盟軍打敗德國嗰陣,會刻「171」響木板同牆上,暗示「吾皇萬歲」(「H7」拆開就係「171」,而「H7」係哈康七世嘅簡稱)[1]

因為佢響國家最脆弱嗰陣用自己嚟團結人民,所以佢畀好多挪威人視為最偉大嘅國家領袖之一。響2005年發表嘅民意調查「世紀最偉大嘅挪威人」入面佢排第八,僅次於前首相布倫特蘭;而第一名係阿仔,奧拉夫五世[2]

影視作品[編輯]

2007年,NRK電影《哈里同查理斯》(英文:Harry & Charles)就係講哈康國王響1905年前瑞典-挪威聯合解體加埋佢畀人選做國王嘅事,由演員雅各·卡特倫扮國王。

2016年,電影《國王的抉擇》上映,講緊德國入侵挪威同埋哈康國王落難嘅事,由賈斯佩·基斯甸臣扮係國王。呢套電影口碑好好,唔單止係挪威2016年度票房冠軍,仲曾經畀人提名去2017年奧斯卡金像獎最佳外語片[3]

2020年,NRK電視劇Atlantic Crossing入面由索倫·布馬克扮演國王。呢套戲係講緊瑪塔王儲妃響1939年至1945年為國家同王室而奔波。

[編輯]

  1. i-tsi, 議誌 (2015-04-29). "從「挪威賣國賊」看台灣未竟的轉型正義之路". The News Lens 關鍵評論網 (中文). 喺2021-08-08搵到.
  2. "Han er Norges beste konge gjennom tidene". www.vg.no (巴克摩挪威文). 喺2021-08-24搵到.
  3. 中時新聞網. "《國王的抉擇》演出挪威國王落難記 呈現改變歷史的一刻 - 娛樂". 中時新聞網 (中文). 喺2021-08-08搵到.