格呂克斯堡王朝

出自維基百科,自由嘅百科全書
跳去導覽 跳去搵嘢
格呂克斯堡王朝家族徽

格呂克斯堡王朝(英文:House of Glücksburg),全名士叻斯域-荷斯地因-森訥堡-格呂克斯堡王朝(德文:Schleswig-Holstein-Sonderburg-Glücksburg;丹麥文:Slesvig-Holsten-Sønderborg-Lyksborg),係一個現存嘅王朝,奧登堡王朝嘅分支。目前家族成員依然掌控住丹麥同埋挪威,歷史上曾經統治過希臘冰島;而由於菲臘親王都係佢哋嘅成員,所以英國王室都擁有格呂克斯堡王朝血統。

簡史[編輯]

呢個家族嘅名係嚟自德國一個鎮格呂克斯堡(Glücksburg)。格呂克斯堡王朝嘅祖先係奧登堡王朝嘅基斯頓三世

1564年,國王費特力二世響重申分配士叻斯域-荷斯地因嘅領土嗰陣,決定將一部份分畀王室成員,最後佢畀咗細佬年輕者約翰。約翰嘅後人後嚟開始分家產,其中一個分支係士叻斯域-荷斯地因-森訥堡-碧克家族

1825年,費特力六世士叻斯域-荷斯地因-森訥堡-格呂克斯堡家族(年輕者約翰嘅後人之一,響1779年絕家)嘅銜頭分畀士叻斯域-荷斯地因-森訥堡-碧克公爵腓特烈·威廉,腓特烈·威廉因而將家族名改為士叻斯域-荷斯地因-森訥堡-格呂克斯堡。

1851年,當時丹麥王室淨低兩位男性成員:國王費特力七世、同佢阿叔費迪南王子。由於兩個人都冇仔女,所以當佢哋響無仔女嘅情況下走咗,就根據費特力三世頒發嘅繼承法,畀同時任國王血緣最近嘅女人繼位。本身黑森嘅腓特烈·威廉係最有望嘅繼承人,但因為身份同種族問題,最後響同年放棄繼承權;而丹麥國會就響一年後,宣佈擁立第五順位繼承人露易絲公主個老公、士叻斯域-荷斯地因-森訥堡-碧克公爵腓特烈·威廉個仔基斯頓做丹麥王儲。1863年基斯頓登基做丹麥國王,係基斯頓九世,亦係格呂克斯堡第一位做國王嘅成員。

1863年,基斯頓九世個二仔威廉王子畀人擁立做希臘國王,係佐治一世。去到1973年,上校團宣佈廢咗君主制,希臘格呂克斯堡王朝玩完;最後一任國王係康士坦丁二世

1905年,費特力八世二仔卡爾王子畀人擁立做挪威國王,稱號係哈康七世,開啟挪威格呂克斯堡王朝。

丹麥國王基斯頓十世響1918年冰島王國成立後曾經畀人擁立做國王,響1944年冰島共和國成立之後就唔再係國王。

1947年希臘王子菲臘同當時英國王儲伊利沙伯結婚,本身佢個姓係士叻斯域-荷斯地因-森訥堡-格呂克斯堡,但佢響入籍英國嗰時決定改用阿媽個姓──「蒙巴頓」;而佢哋後人個姓係「蒙巴頓ー溫莎」。

士叻斯域-荷斯地因-森訥堡-格呂克斯堡公爵[編輯]

內文:士叻斯域-荷斯地因-森訥堡-格呂克斯堡公爵
士叻斯域-荷斯地因-森訥堡-格呂克斯堡公爵徽

士叻斯域-荷斯地因-森訥堡-格呂克斯堡公爵一開頭其實係格呂克斯堡家族嘅嫡流,因為丹麥國王基斯頓九世就係士叻斯域-荷斯地因-森訥堡-碧克公爵腓特烈·威廉個仔。但由於佢哋唔係做國王,所以依家佢哋變成格呂克斯堡王朝嘅分支。

1863年,士叻斯域-荷斯地因畀奧地利同埋普魯士佔領,所以佢哋嘅公爵銜頭係名義上嘅。

另外,由於奧登堡王朝響1931年絕家(阿頭亞厘畢走咗,冇仔),要搵個同奧登堡王朝血緣最近嘅男性做奧登堡王朝家族阿頭,所以佢哋搵咗腓特烈·費迪南兼任佢哋阿頭。

現任公爵係基斯托夫;而儲君就係腓特烈·費迪南。

在位時期 生死
Friedrich Wilhelm, Duke of Schleswig-Holstein-Sonderburg-Glücksburg.jpg 腓特烈·威廉 1825年ー1831年 1785年ー1831年
1813 Carl von Glucksburg.jpg 卡爾 1831年ー1878年 1813年ー1878年
Friedrich, Duke of Schleswig-Holstein-Sonderburg-Glücksburg (1841).jpg 腓特烈 1878年ー1885年 1814年ー1885年
Friedrich Ferdinand, Duke of Schleswig-Holstein.jpg 腓特烈·費迪南 1885年ー1934年 1855年ー1934年
Prinz Friedrich zu Holstein-Glücksburg.jpg 威廉·腓特烈 1934年ー1965年 1891年ー1965年
彼得 1965年ー1980年 1922年ー1980年
Christoph of Schleswig-Holstein 2010.jpg 基斯托夫 1980年ー 1949年ー

丹麥王位[編輯]

內文:丹麥君主
丹麥王家徽

1853年基斯頓成為丹麥王儲;十年後登基做國王,係基斯頓九世,開始丹麥格呂克斯堡王朝。依家嘅君主係瑪嘉烈二世;王儲係費特力

統治時期 生死
1818 Christian-05.jpg 基斯頓九世 1863年ー1906年 1818年ー1906年
Otto Bache - Portræt af Frederik VIII - 1909.jpg 費特力八世 1906年ー1912年 1843年ー1912年
Christian X - Peter Elfelt.jpg 基斯頓十世 1912年ー1947年 1870年ー1947年
Deense Koning in zijn woning in paleis Brockdorff in Slot Amalienborg, Bestanddeelnr 252-8630 (cropped).jpg 費特力九世 1947年ー1972年 1899年ー1972年
P4G Copenhagen Summit Day 1, 03 (cropped).jpg 瑪嘉烈二世 1972年ー 1940年ー

希臘王位[編輯]

內文:希臘君主
希臘王家徽

1863年,基斯頓九世個二仔威廉王子畀希臘國會擁立做希臘國王,係佐治一世,開啟希臘格呂克斯堡王朝。1967年軍方發動政變,希臘王室名存實亡;1973年,上校團宣佈廢咗君主制,再冇希臘國王呢回事。

最後一任希臘國王係康士坦丁二世;而最後一任王儲就係帕夫羅斯

統治時期 生死
Portrait of King George I of Greece, National Historical Museum, 8 March 2020.jpg 佐治一世 1863年ー1913年 1845年ー1913年
Constantine1 Greece.jpg 康士坦丁一世 1913年ー1917年
1920年ー1922年
1868年ー1923年
King Alexander of Greece.jpg 亞歷山大 1917年ー1920年 1893年ー1920年
George II of Greece, King of the Hellenes.jpg 佐治二世 1922年ー1924年
1935年ー1947年
1890年ー1947年
Bundesarchiv Bild 183-2003-1103-501, Berlin, Olympiade, Spyridon Louis, Kronprinz Paul (cropped1).jpg 保羅一世 1947年ー1964年 1901年ー1964年
Constantine II of Greece.jpg 康士坦丁二世 1964年ー1973年 1940年ー

挪威王位[編輯]

內文:挪威君主
挪威王家徽

1905年,費特力八世二仔卡爾王子畀人擁立做挪威國王,稱號係哈康七世,開啟挪威格呂克斯堡王朝。現任國王係哈拉德五世;而王儲就係哈康

統治時期 生死
Haakon VII Bain.jpg 哈康七世 1905年ー1957年 1872年ー1957年
Kronprins Olavs hjemkomst, 13. mai 1945, Kronprinsen legger atter Oslo for sine føtter, Oslo Museum, OB.F12570h - Crop.jpg 奧拉夫五世 1957年ー1991年 1903年ー1991年
Harald V en 2018 (cropped).jpg 哈拉德五世 1991年ー 1937年ー

冰島王位[編輯]

冰島王國徽

1918年冰島王國成立,冰島國會擁立丹麥國王基斯頓十世兼任佢哋嘅國王。去到1944年,冰島共和國成立,所以唔再有冰島國王呢回事。

統治時期 生死
Christian X - Peter Elfelt.jpg 基斯頓十世 1918年ー1944年 1870年ー1947年