康士坦丁二世 (希臘)

出自維基百科,自由嘅百科全書
跳去導覽 跳去搵嘢
康士坦丁二世
King Constantine.jpg
希臘人之王
在位1964年3月6號ー1973年6月1號
前任保羅一世
繼任君主制畀人廢除

配偶安妮-瑪麗王后
子嗣
儲君帕夫羅斯王儲
家族格呂克斯堡王朝
父王保羅一世
母后弗迪烈卡
出世 (1940-06-02) 1940年6月2號(81歲)
出世地希臘王國雅典

康士坦丁二世(希臘文:Κωνσταντῖνος Βʹ Konstantínos II1940年6月2號—),係希臘末代國王,1964年上任,去到1973年君主制畀人廢咗為止。第二年佢同意公投結果,兼且承認希臘第三共和國嘅成立。

早年[編輯]

1940年康士坦丁二世響希臘雅典Psychiko王宮出世,係時任希臘王儲保羅一世同王儲妃弗迪烈卡嘅第二個細路,第一個仔,有一個家姐蘇菲亞同細妹伊蓮;亦係時任國王佐治二世嘅侄仔。因為當時希臘王位係傳男唔傳女,所以佢一出世就係王位假定繼承人(佐治二世冇仔女),而希臘王室亦有搞活動慶祝佢嘅出世。

康士坦丁好唔好彩咁響二戰期間出世。由於1941年至1946年希臘畀軸心國霸咗,佢老豆保羅帶住一家大細同阿伯佐治二世先後流亡到埃及開羅英國倫敦,最後響南非開普敦安身。1946年佢同大人一齊返到希臘,而佐治二世響一年後死咗,老豆保羅升做國王,康士坦丁亦升為王儲。

王儲時代[編輯]

佢響1960年奧運響風帆比賽攞到金牌

康士坦丁曾經響希臘海、陸、空三軍服役,亦響德國北約Air Force Special Weapons School讀過書。後嚟到雅典大學攻讀法律系。

佢運動好叻,曾經響1960年羅馬奧運會帆船運動比賽龍骨艇代表希臘攞到金牌,係希臘自1912年奧運以嚟第一面帆船金牌,當時佢只有20歲。佢游水亦都好叻,仲攞到空手道黑帶。另外佢都對壁球、田徑同騎馬有興趣[1]

1963年,佢成為國際奧林匹克委員會成員。雖然響1974年,因為希臘第三共和國成立,佢畀人趕出希臘同埋冇咗希臘國籍,因而畀人取消奧委會成員,但後嚟佢又做咗奧委會榮譽成員。

國王時代[編輯]

1966年

1964年,老豆保羅一世因癌症而死,身為王儲嘅康士坦丁就繼位做國王,係康士坦丁二世。佢嘅上任一度畀人視為希臘改革嘅希望,但後嚟破滅[2]

1967年4月21號,陸軍上校佐治斯·帕帕佐普洛斯發動軍事政變。無耐,軍方領袖就派人見國王康士坦丁。康士坦丁最初叫佢哋走,之後先至慢慢去國防部。經過討論之後,國王最後承認咗軍方成立「上校團」嘅軍政府,去取代時任總理Panayiotis Kanellopoulos嘅右派政府,仲接受佢哋嘅宣誓,令到上校團開始咗長達七年嘅獨裁時期。Panayiotis Kanellopoulos後嚟話,佢畀軍政府攞住機關槍嘅士兵恐嚇,先至去王宮接國王。

康士坦丁後嚟決定響12月13號發動反軍方政變,又去到卡華拉,希望見到一班仲對王室忠心嘅士兵。而三軍之中,除咗發動政變嘅陸軍,海軍同空軍都依然支持國王。佢期望派軍佔領希臘第二大城市帖撒羅尼迦,成立新政府去延續佢嘅統治,對抗上校團,同埋得到國際社會嘅承認。但係國王都係太天真,冇好好去計劃同埋組織,結果畀軍政府先發制人,搶先控制住海軍同空軍同埋佔領帖撒羅尼迦。軍政府甚至出兵打卡華拉,要捉住國王。

意識到政變失敗嘅康士坦丁,響同日夜晚帶埋老婆仔女兼總理Panayiotis Kanellopoulos,搭咗王家飛機,走難到羅馬,王室由呢一刻開始名存實亡。由於國王走咗佬,佐治斯·帕帕佐普洛斯宣佈自己係總理同攝政王[3]

軍政府曾經同國王講數,話可以接佢返嚟希臘。但康士坦丁唔同意軍政府嘅條件,談判破裂。

1973年,上校團宣佈廢咗君主制同埋王室,佢再都唔係希臘國王。

希臘民主公投[編輯]

1974年,土耳其入侵塞浦路斯令到軍政府倒台,原先流亡嘅康士坦丁·卡拉曼利斯得以返嚟希臘。康士坦丁滿心以為佢會恢復1952年希臘憲法,所以歡迎卡拉曼利斯,同埋邀請佢做首相。但係卡拉曼利斯並冇恢復1952年嘅希臘憲法,淨係另外再頒佈一份新憲法。

卡拉曼利斯帶領住新民主黨響國會選舉中大勝,就話響12月8日搞公投,決定希臘係要用君主立憲制,定係建立共和國。公投嘅結果顯示,絕大部分民眾支持改建共和國。希臘第三共和國因而成立。

退位後[編輯]

2010年嘅康士坦丁二世

康士坦丁並冇好似其他末代國王咁希望恢復王位,而係承認共和國嘅成立,仲話:

如果希臘人決定佢哋要一個共和國,咁佢哋就有呢個資格同埋響和平之中享受佢。

自此,佢一直響外國生活,只係響特殊情況先至有機會返希臘。就好似響1981年,佢返王宮出席阿媽弗迪烈卡嘅葬禮[4]

1992年,佢簽咗一份協議,將自己響希臘嘅土地畀一個非營利基金會,去攞返塔托伊宮。1994年,總理安德烈亞斯·帕潘德里歐決定推翻佢響1992年嘅協議,仲取消佢嘅希臘戶藉同埋土地。康士坦丁將希臘政府告上法庭,要求政府賠返五億歐羅畀佢,但最後法院淨係判政府要賠返一千二百萬歐羅;另外,法院仲話賠返土地並唔係希臘政府嘅責任[5]

由於康士坦丁冇咗護照,搞到佢淨係可以用「丹麥王子康士坦丁」呢個名攞到丹麥國籍(希臘王室係丹麥王室嘅分支)。而佢同老婆安妮-瑪麗多年嚟都住響英國。佢同堂大佬威爾斯親王查理斯好老友,仲係劍橋公爵威廉王子嘅教父[4]

自1994年開始,佢同挪威國王哈拉爾五世出任世界帆船嘅榮譽聯席主席[6]

2004年,佢去到希臘總統府,同時任總統科斯蒂斯·斯特凡諾普洛斯見面。2013年,佢終於可以返去希臘生活[4]

屋企[編輯]

康士坦丁二世、老婆安妮-瑪麗、狄奧多拉公主同菲臘王子嘅合照

1964年9月18號,佢同丹麥國王費特力九世個細女安妮-瑪麗雅典都主教座堂結婚,有三個仔兩個女:

稱呼[編輯]

  • 1940年6月2號ー1964年3月6號:希臘王子康士坦丁
  • 1964年3月6號ー1973年6月1號:希臘人之王康士坦丁
  • 1973年6月1號ー1994年:前希臘國王康士坦丁

1994年,總理安德烈亞斯·帕潘德里歐決定註銷佢嘅戶藉同財產。康士坦丁二世想攞返戶籍,唯一嘅方法就係幫自己改個姓。但康士坦丁二世就話:「我冇姓—我嘅屋企冇姓。依家總理帕潘德里歐通過嘅法例基本上認為我唔係希臘人、只有響行使希臘國王職權嗰陣我先係希臘人…最大嘅問題,係我嘅祖先丹麥王室都冇姓,而我嘅家族格呂克斯堡王朝,但「格呂克斯堡」係地方名而唔係姓…或者我可以叫我做肯辛頓先生。」

之後佢以丹麥王室後人嘅身份獲得丹麥護照,戶籍名係「希臘嘅康士坦丁」(Constantino de Grecia),利用呢本護照佢可以自由進入希臘。一開始佢畀某啲希臘媒體笑,叫佢做「Κωνσταντίνος Ντεγκρέτσιας」[7]

國際奧委會到依家都叫佢做「希臘國王康士坦丁殿下」。響希臘,市民多數叫佢做「前國王」。佢嘅官方網站就叫自己做「國王康士坦丁,前希臘人之王」[8]

[編輯]

  1. "Crown Prince Konstantinos Bio, Stats, and Results | Olympics at Sports-Reference.com". web.archive.org. 2020-04-18. 喺2022-02-06搵到.
  2. "Ailing Greek King Names Son Regent". The New York Times (英文). 1964-02-21. ISSN 0362-4331. 喺2022-02-06搵到.
  3. Hindley, Geoffrey (1979). The royal families of Europe. Internet Archive. London : Lyric Books. ISBN 978-0-7111-0005-3.
  4. 4.0 4.1 4.2 "Greece's former king goes home after 46-year exile". the Guardian (英文). 2013-12-15. 喺2022-02-06搵到.
  5. "Court deals decisive blow to deposed Greek royals". the Guardian (英文). 2002-11-29. 喺2022-02-06搵到.
  6. "The Greek Royal Family - The Royal Family". web.archive.org. 2012-02-17. 喺2022-02-06搵到.
  7. "Ελευθεροτυπία - Δεν περνάει η μπογιά του". archive.ph. 2013-02-18. 原先內容歸檔喺2013-02-18. 喺2022-02-06搵到.
  8. "FAQ". www.greekroyalfamily.gr. 喺2022-02-06搵到.