費特力九世

出自維基百科,自由嘅百科全書
跳去導覽 跳去搵嘢
費特力九世
Frederick IX in 1947.png
啱登基無耐嘅費特力九世
丹麥君主
在位1947年4月20號ー1972年1月14號
前任基斯頓十世
繼任瑪嘉烈二世

配偶瑛格烈王后
子嗣
家族格呂克斯堡王朝
父王基斯頓十世
母后亞歷珊德蓮王后
出世1899年3月11號
出世地丹麥 丹麥羅森堡寧比
1972年1月14號(1972-01-14)(72歲)
死地丹麥 丹麥哥本哈根

費特力九世(丹麥文:Frederik 9.1899年3月11號1972年1月14號),全名基斯頓·費特力·法蘭茲·米高·卡爾·華德馬·佐治(丹麥文:Christian Frederik Franz Michael Carl Valdemar Georg),係前丹麥國王,1947年去到1972年在位。

家族[編輯]

丹麥王室四代同堂—分別有基斯頓九世(左)、基斯頓王子、費特力王子、費特力王儲(右)

費特力響羅森堡寧比無憂宮出世,係當時嘅丹麥王子基斯頓(即後嚟嘅基斯頓十世)同佢表妹亞歷珊德蓮共同嘅第一個細路,阿爺係時任王儲費特力(即後嚟嘅費特力八世),太爺就係時任丹麥國王基斯頓九世。費特力之後多一個細佬克努。阿媽亞歷珊德蓮公主,係美倫堡-施威林大公腓特烈·法蘭茲三世同埋安娜斯塔西婭·米哈伊羅芙娜女大公共同嘅大女,兼且係沙皇尼古拉一世嘅孫女。

佢響同年4月9號受洗,而教父有成21個咁多,有:太爺基斯頓九世、沙皇尼古拉二世、希臘國王佐治一世、挪威同瑞典國王奧斯卡二世、阿爺費特力八世、威爾斯親王愛德華(即後嚟嘅愛德華七世)同埋佢舅父腓特烈·法蘭茲四世

基斯頓九世響1906年走咗,阿爺費特力登基做國王,老豆升為王儲,而費特力自己亦升為第二王位繼承人。但係響六年之後,費特力八世就走咗,老豆基斯頓登基,費特力自己就升做王儲。

早年[編輯]

後生嗰陣嘅費特力

費特力響丹麥王家海軍學院接受教育,係第一位丹麥王室成員響海軍而唔係陸軍做嘢嘅人。後嚟佢升上哥本哈根大學。響未做國王之前,佢係一位海軍少將。

另外,佢好鍾意出海同旅行,後生嗰陣成日周圍去玩;亦係一位出色嘅鋼琴家指揮家,仲曾經做過哥本哈根交響樂團(Copenhagen Symphony Orchestra)嘅指揮。

關於佢嘅結婚問題,其實都煩咗佢幾耐。早年,佢阿媽亞歷山德蓮曾經想費特力同瑪麗亞·尼古拉耶芙娜女大公或者安娜斯塔西亞女大公,沙皇尼古拉二世兩個女之中揀一個做佢嘅老婆,但因為尼古拉二世響1918年闔家畀人處決而算數。

費特力響四年後曾經同奧嘉公主訂婚,但響公佈後無耐女方就退婚,主要原因係費特力響公開場合唔單止唔拖住奧嘉隻手,反而走去拖住奧嘉一個姐妹嘅手。最終佢響三十五歲嗰陣,同瑞典公主瑛格烈結婚。

統治時代[編輯]

1954年嘅費特力九世

1942年,由於佢老豆基斯頓十世響騎馬嗰陣墮馬受傷,所以由費特力做攝政王一年咁多。

1947年,基斯頓十世走咗,由王儲費特力繼位做國王,係費特力九世

1948年,法羅群島宣佈成為自治國家,唔再係丹麥嘅一個縣,而係由有高度自治嘅法羅群島政府管理。

費特力九世響統治下見證住丹麥巨大嘅變化。響佢在位期間,丹麥由農業國家發展成福利國家。特別係響六十年代經濟嘅高速發展,丹麥女性更加有得出嚟打工,成為勞動力人口嘅一分子。

費特力九世以佢嘅親和力同埋和藹可親嘅性格而聞名,對於打破王室同民眾嗰陣隔閡有住好大功勞。呢點亦影響到佢大女,即第日嘅瑪嘉烈二世

王位繼承法[編輯]

根據1853年定落嘅丹麥王位繼承法,丹麥王室淨係畀男性繼位做國王。但當時費特力同瑛格烈王后淨係得三個女,所以當時王位第一繼承人係佢細佬克努王子,之後係克努個大仔英戈夫王子

響1953年,國會通過《繼承法》,將繼承方式改為男性優先,但係如果國王冇仔都可以畀個女繼承。咁樣就代表住費特力就算冇仔,都可以將王位傳畀自己個女。

最後,費特力九世個大女瑪嘉烈公主響同年成為王儲。

死同葬禮[編輯]

費特力九世嘅陵墓

費特力響發表完1972年嘅新年講話無幾耐,就出現咗類似流感嘅跡象。1月3號,佢因為心臟驟停而畀人送去哥本哈根市政醫院。雖然情況曾經一度好轉,但響八日後病情轉差,最後響1月14號上晝七點五十分由屋企人嘅陪同下走咗,終年七十二歲。

佢走咗之後,條屍曾經短暫畀人放響阿馬林堡宮,響1月18號轉到基斯頓堡宮。響基斯頓堡宮,佢條屍放響悲傷城堡上面,呢一點自1670年費特力三世之後就冇變過。屍體響去到佢嘅葬禮嗰陣都係瞓喺度嘅狀態,響呢段時期市民可以前往瞻仰佢嘅遺容。

同年1月24號,哥本哈根大主教Willy Westergaard Madsen先係搞咗一系列嘅儀式,分別係一個簡單嘅祈禱同埋唱聖詩。之後,屍體由王家內近衛騎兵團放響前車上面,用於送到去哥本哈根火車總站。前車由四十八位水手推動,丹麥陸、空、海三軍儀仗隊護送,另外亦有嚟自法國、瑞典、英國同埋美國嘅儀仗隊。去到哥本哈根火車總站之後,棺材放響一個特別嘅火車車廂入面,無耐架車就將棺材送去羅斯基勒。一到咗羅斯基勒,成班水手就將棺材送到羅斯基勒主教座堂,之後費特力九世就響嗰度下葬。

特別嘅係,費特力九世嘅棺材唔係好似前幾任國王咁放響教堂入面,而係響教堂出面一個陵墓,呢個係國王嘅意願。

響佢死嗰日,大女瑪嘉烈公主登基,係丹麥女王瑪嘉烈二世。而佢老婆瑛格烈王后響佢走後過多咗二十八年,響2000年11月7號走咗,死後亦葬響佢隔離。

屋企[編輯]

費特力九世一家五口嘅合照

1935年5月24號,費特力九世響斯德哥爾摩大教堂同西博藤公爵古斯塔夫·阿道夫親王個妹、時任瑞典王儲古斯塔夫(即後嚟嘅古斯塔夫六世阿道夫)個女瑛格烈公主結婚,出席佢哋婚禮嘅包括費特力九世個阿爸阿媽、比利時國王利奧波德同王后阿斯特里德挪威王儲奧拉夫同王儲妃瑪塔。佢哋有三個女:

紀念[編輯]

響佢登基三十五周年夾佢死咗十年嗰陣,費特力九世嘅紀念銅像響哥本哈根港口揭幕。

另外,響Roskilde Fjord連接到腓特烈松嘅費特力王儲大橋、由古爾堡松連接到法爾斯特島同埋洛蘭島費特力九世大橋,都係以佢嚟命名。

仲有,由Sir Martin Lindsay響1934年發現響格陵蘭東邊發現一座山脈,Martin Lindsay將呢座山脈命名叫「費特力王儲山脈」,以費特力九世嚟命名。