奧拉夫五世
| 奧拉夫五世 | |
|---|---|
 | |
| 挪威國王 | |
| 在位 | 1957年9月21號ー1991年1月17號 |
| 加冕 | 1958年6月22號 |
| 前任 | 哈康七世 |
| 繼任 | 哈拉爾五世 |
| 配偶 | 瑞典瑪塔公主 |
子嗣 | |
| 家族 | 格呂克斯堡王朝 |
| 父王 | 哈康七世 |
| 母后 | 威爾斯公主慕德 |
| 出世 | 1903年7月2號 |
| 出世地 |  英國英格蘭諾福克郡山靜咸府 |
| 死 | 1991年1月17號（87歲） |
| 死地 |  挪威奧斯陸Holmenkollen皇家旅館 |
| 簽章 | File:Olav V signature.png |
奧拉夫五世（挪威文：Olav V，1903年7月2號—1991年1月17號），出世名亞歷山大·愛德華·基斯頓·費特力（挪威文：Alexander Edward Christian Frederik），係挪威國王，1957年至1991年在位。
家族同早年[編輯]
奧拉夫五世原本叫丹麥王子亞歷山大，1903年7月2號響諾福克郡山靜咸府嘅Appleton House出世，係丹麥卡爾王子同威爾斯公主慕德嘅獨仔。佢阿爺係時任丹麥王儲費特力，阿公就係時任英國國王愛德華七世。
1905年，老豆卡爾王子獲得挪威議會擁立成新一任挪威國王，改名叫「哈康七世」。而卡爾王子就將亞歷山大改名叫「奧拉夫」，以丹麥同挪威國王奧拉夫二世·哈康松嚟命名。奧拉夫係挪威自中世紀以嚟嘅第一位響挪威本土長大嘅王儲。
同老豆相反，老豆係海軍出身，而奧拉夫就係陸軍出身。佢響1924年以全級第四名畢業於挪威陸軍學校，之後又響牛津大學貝里歐學院修讀法學同經濟學兩年。
奧拉夫亦係一位運動員，識玩好多項目，曾經響霍爾門科倫滑雪跳臺參加過滑雪比賽。響1928年夏季奧林匹克運動會，佢代表挪威攞到帆船比賽金牌。
1929年，佢同表姐瑞典瑪塔公主響奧斯陸結婚。
響1930年左右，佢成為海軍學員，響挪威皇家海軍艦艇Olav Tryggvason（奧拉夫·特里格維松）。跟住佢先後升為上尉同上校。
二戰時期[編輯]
作為挪威王儲，佢接受咗廣泛嘅軍事訓練，又參與過好多主要嘅軍事演習。奧拉夫因為佢嘅見解同領導才能，受到其他國家領導人嘅敬重。響二戰前，佢訪問美國期間，同美國總統羅斯福建立親密嘅友誼。呢點成為日後挪威對抗納粹德國進攻嘅重要因素之一。1939年，奧拉夫被任命為挪威皇家海軍嘅上將同陸軍嘅將軍。
1940年4月，納粹德國打住保持丹麥同挪威中立嘅名，乘機想入侵兩國，威悉演習行動開始。期間，奧拉夫企響老豆個邊，堅決抵制納粹德國。無論係對軍事領導人定係人民嚟講，奧拉夫都係一位極具價值嘅顧問。當挪威政府被逼流亡海外嗰陣，奧拉夫唔肯，話要同人民一齊抵抗，呢個諗法好快就畀人拒絕。佢勉強地跟住老豆流亡到英國，響嗰度，佢同佢嘅助手都成為流亡政府兼老豆嘅主要顧問。最初，佢同老豆響白金漢宮度住，但隨住同年9月嘅倫敦大轟炸，佢哋搬到去柏莎郡嘅 Bowdown House。奧拉夫亦曾經響英國、加拿大、美國同挪威、盟軍部隊見面。1944年，佢出任挪威國防部部長，響二戰完之後解除納粹德軍嘅武裝。
1945年5月13號，奧拉夫同其他五位政府部長返到挪威。而父王哈康就響6月7號先返到嚟挪威。
佢得到包括挪威、法國、希臘同尼德蘭嘅戰爭十字勳章，又得到美國功勳勳章同法國軍事勳章，證明咗國際認可佢對德國抵抗運動嘅貢獻。
統治[編輯]
1955年7月，父王哈康響Bygdøy Royal Estate嘅沖涼房入面跌親，要坐輪椅。由呢個時候開始，奧拉夫代父王處理國事。1957年9月21號，父王哈康響奧斯陸王宮走咗，終年八十五歲。奧拉夫繼位做挪威國王，係奧拉夫五世。
奧拉夫亞世畀人叫做「人民嘅國王」，好受到人民嘅歡迎。雖然佢係國王，但佢鍾意響公共行車路上揸車。響1973年石油危機期間，由於石油畀人禁運，挪威禁止人民響禮拜日開車。咁啱當時國王想滑雪，本身佢作為國王係可以開車，但佢想以身作則，結果佢一個人著住滑雪衫、攞住滑雪板坐城市鐵路霍爾門科倫線去滑雪。後嚟佢畀人問到點解會夠膽響冇保鏢嘅情況下公然出街，佢就答：「我有400萬保鏢」（保鏢指緊挪威人民，當時挪威有400萬人口）。
由於佢嘅運動天賦同埋身為國王嘅角色，佢響1968年攞到霍爾門科倫獎章、1970年攞到傑出公民成就獎、1975年成為挪威年度人物。佢對軍事有住濃厚嘅興趣，好認真咁對待自己作為軍隊總司令嘅角色。除咗係挪威軍隊名義上嘅最高領導人之外，佢仲係英國約克郡軍團嘅榮譽上校。
佢在位期間多次代表挪威訪問其他國家，訪問過34個國家，有埃塞俄比亞、伊朗等。1975年7月，佢主持第十四屆世界童軍大露營嘅開幕禮。
奧拉夫五世作為國家統一嘅象徵，有住好大嘅道德權威，響紙面上保留比較大嘅權力，但佢唔負責行使權力。佢主要職責都係偏向「儀式性嘅」。如果冇首相嘅附署，佢嘅行為會畀法律睇成「無效」。國王都有權任命內閣，但佢唔可能違背議會嘅諗法。
過身[編輯]
1990年夏天，奧拉夫五世嘅身體出咗問題，但響聖誕期間好返。1991年1月17號，佢響皇家別墅突然病發，當日夜晚就因為心肌梗塞而過身，終年87歲。王儲哈拉爾好快就登基，成為哈拉爾五世。哈拉爾五世嘅採訪同埋前挪威議會主席祖·本柯嘅自傳入面都有提過，奧拉夫五世響得知波斯灣戰爭爆發後留低心理創傷。
響佢過身當日同埋國葬前嘅幾日，挪威人民都有公開哀悼佢，響奧斯陸皇宮對開嘅廣場放住成千上萬嘅蠟燭，亦有信同埋卡片。
奧拉夫五世嘅國葬響1月30號舉行。響由皇宮到奧斯陸主教座堂嘅送葬路線上，有多過十萬人響卡爾·約翰斯大道前排隊以示敬意。總理布倫特蘭響葬禮上致詞。跟住棺材就畀人移到阿克斯胡斯城堡。佢最終畀人葬響皇家陵園，同老婆瑪塔葬埋一齊。
影響[編輯]
由於奧拉夫五世嘅老婆瑪塔死響癌症手上，奧拉夫五世國王癌症研究獎響1992年設立。
響2005年發表嘅民意調查「世紀最偉大嘅挪威人」入面，奧拉夫五世排第一。
影視形象[編輯]
- 2009年NRK電影《哈里同查理斯》（英文：Harry & Charles），由Viktor Andersen扮奧拉夫五世
- 2016年NRK電影《國王的抉擇》，由Anders Baasmo扮奧拉夫五世
- 2021年NRK電影《Atlantic Crossing》，由托比亞斯·桑托爾曼扮奧拉夫五世