佐治六世

出自維基百科,自由嘅百科全書
英王佐治六世
官方畫像
英國同英屬海外各自治領土國王
在位1936年12月11號-1952年2月6號
加冕1937年5月12號
前任愛德華八世
繼任伊利沙伯二世
英聯邦元首
在位1949年4月28號-1952年2月6號
繼任伊利沙伯二世
印度皇帝
在位1936年12月11號-1947年8月15號
前任愛德華八世

配偶伊利沙伯·鮑斯ー利昂
子嗣
全名
亞厘畢·費特力·阿瑟·佐治·溫莎
家族溫莎王朝(1917年-)
薩克森-科堡-哥達王朝(1895年-1917年)
父王佐治五世
母后瑪麗王后
出世(1895-12-14)1895年12月14號
出世地 大不列顛及愛爾蘭聯合王國諾福郡山靜咸府約克别墅英文York Cottage
1952年2月6號(1952-02-06)(56歲)
死地英國 英國諾福郡山靜咸府
陵墓1952年2月15號
英國 英國溫莎堡聖佐治禮拜堂

佐治六世George VI1895年12月14號1952年2月6號),全名亞厘畢·費特力·阿瑟·佐治·溫莎(英文:Albert Frederick Arthur George Windsor),係英國同英屬海外各自治領嘅國王、印度皇帝同愛爾蘭王,兼第一任英聯邦元首。1936年12月登基,接佢退位嘅阿哥英王愛德華八世,去到1952年駕崩。

作為二仔,亞厘畢原先根本唔會繼承王位。所以佢接受好少關於做國王嘅訓練,亦響好多方面比較有選擇權。後生嗰陣,佢曾經響海軍空軍服役,參加過日德蘭海戰。1920年,佢成為約克公爵

1936年,大佬愛德華八世因為死要同華莉絲·辛普森結婚,所以揀咗退位。亞厘畢就登基成為國王,王號佐治,即佐治六世

任內見證第二次世界大戰,佢喺大戰中以身作則鼓勵帝國軍民共同抗敵。戰後英國國力衰退,大英帝國蛻變成英聯邦,原本英國控制嘅印度帝國分裂為印度同埋巴基斯坦,令佢成為末代印度皇帝;愛爾蘭亦都跟住正式改為共和國,佢因為咁而成為最後一位愛爾蘭王。

佢同王后伊利沙伯生咗兩個女:伊利沙伯同瑪嘉烈。佢因為操勞於二戰戰事而係噉煲煙,令佢身體好快惡化,最終喺佢大女喺肯雅訪問時駕崩,大女於是登基,成為女王伊利沙伯二世

早年[編輯]

1895年12月14號,佐治六世響諾福郡山靜咸府約克別墅英文York Cottage出世,係約克公爵佐治王子(即後嚟嘅佐治五世)同公爵妃瑪麗共同嘅第二個細路,威爾斯親王愛德華(即後嚟嘅愛德華七世)個孫。阿媽瑪麗,係特克公爵法西斯第一個細路兼唯一一個女。

由於佢出世個日正正係太爺亞厘畢親王走咗嘅第34年(即忌日),由於唔肯定女皇維多利亞聽到會有乜感受,阿爺愛德華同佐治講:「我覺得女王聽到後會好傷心」。兩日後,佢又同佐治講:「如果將呢個細路改個名叫亞厘畢,女王會好開心,我真心係咁諗」。女王聽到呢個細路將會改名叫「亞厘畢」嗰陣,就同瑪麗講:「我好想快啲見到佢,雖然佢響咁悲傷嘅一日出世,但對我嚟講係更加有親切感,特別係啲人會叫佢呢個咁親愛嘅名,呢個偉大又好好嘅名。」換言之係批准咗呢個名。所以,呢個細路響1896年2月17號受洗嗰陣,正式命名叫「亞厘畢·費特力·阿瑟·佐治」,以太爺亞厘畢親王嚟命名。

響平時,屋企人都會習慣性地叫佢「伯堤」(Bertie)。但係阿婆瑪麗·阿德萊德郡主並唔鍾意呢個名,表示:「希望你最後個名(佐治)可以取代呢個咁唔受歡迎嘅名(亞厘畢)」,間接預言咗第日佢登基嗰陣揀嘅名。

佢一出世就係王位第四順位繼承人,排響阿爺、老豆,同大佬愛德華(即後嚟嘅愛德華八世)後面。

細個嘅佢身體並唔好,啲人形容佢係「好易畀人嚇親同埋易喊」。另外佢有口吃(呢個病影響咗佢好多年),亦出現膝外翻同埋慢性胃潰瘍嘅情況,令到佢自細就要著矯正板。佢係一位左優,但自於當時嘅習俗,佢被迫要學識用右手寫字。

1898年維多利亞女皇下咗特許令,佢嘅頭銜由His Highness變成His Royal Highness。

1901年,維多利亞女皇走咗,阿爺繼位成國王、老豆升為王儲,而佢自己就升為第三順位繼承人。

教育同軍人生涯[編輯]

1920年嘅亞厘畢王子

1909年,佢畀人送去奧斯本皇家海軍學院,做咗軍校學員。雖然響1911年,佢響期末試考包尾,但最後都係升咗上不列顛尼亞皇家海軍學院。期間,佢阿爺愛德華七世走咗,老豆繼位成佐治五世,自己亦升為第二順位繼承人;王儲就係大佬愛德華。

1913年,佢用咗六個月時期響一艘叫陛下之金巴倫艦嘅訓練船。同年9月,佢成為陛下之哥寧伍艦嘅海軍軍官候補生。之後佢響地中海過咗三個月,但都唔能夠克服暈船浪。響一戰爆發咗三個禮拜之後,佢走到鴨巴甸,響嗰度佢因為身體問題而畀醫生John Marnoch切咗個闌尾。佢響緊急文件入面提到佢響日德蘭海戰入面成為陛下之哥寧伍艦嘅炮塔長;不過佢因為消化性潰瘍而被迫響11月做手術,並冇親眼睇到一戰嘅結束。

隨住皇家空軍嘅成立,佢響1918年轉投空軍。直到1918年8月,佢都係英國皇家空軍基地Boys' Wing第四中隊嘅指揮官,響聖李安納皇家空軍學員學校報告之前。佢後嚟完成咗飛行訓練,仲響Cadet Wing做過一個中隊嘅指揮官。佢係第一位得到合格飛行員資格嘅英國王室成員。

佢好希望可以響歐洲參軍,所以佢接受咗曉治·特倫乍得嘅邀請函。10月23號,佢去咗法國歐天尼。響一戰最收尾嘅幾個禮拜,佢到LAF同埋做咗LAF響法國南錫總部嘅參謀。雖然之後LAF解散咗,但佢都係以皇家空軍參謀嘅身份留多兩個月,直至到畀人派遺返英國。11月22號,佢同比利時阿爾軷一世到過布魯塞爾。

1919年7月佢得到英國皇家空軍飛行員資格,仲做埋中隊隊長。同年10月佢去到劍橋大學三一學院修讀歷史、經濟同公民教育,讀咗一年。1920年6月4號,佢獲封為約克公爵、延文禮士伯爵同基拉尼男爵。咁樣意味住佢會更多咁代表王室出席公開活動:佢開始代表老豆參觀煤礦場、工廠同鐵路場。由於佢有口吃,加上佢又怕醜,令到佢睇落冇大佬愛德華咁有自信。

婚姻[編輯]

內文:約克公爵亞厘畢王子同伊利沙伯·鮑斯ー利昂嘅婚禮
1925年嘅亞厘畢王子同老婆伊利沙伯

由於佢上有大佬愛德華,冇乜可能繼位做國王,正正就係咁,佢響揀老婆嗰陣有住更大嘅自由度。

名媛、當時已經結咗婚嘅拉夫堡公爵夫人沙里拉基瑟姆同佢有過一段戀情,但因為亞厘畢要換取老豆佐治五世封佢為約克公爵,所以就同沙里拉斷咗關係。

響同沙里拉分手之後,佢第一次見到伊利沙伯·鮑斯ー利昂。伊利沙伯係一位蘇格蘭貴族,第十四代斯塞莫同京荷恩伯爵克勞德·鮑斯ー利昂嘅第九個細路。亞厘畢對佢一見鍾情,仲下定決心一定要娶到佢返嚟。但係伊利沙伯先後拒絕亞厘畢分別響1921年同1922年嘅求婚,原因係「驚以後都唔能夠再自由咁生活」。

當亞厘畢宣佈非伊利沙伯唔娶之後,阿媽瑪麗王后親自同伊利沙伯見面。佢認為呢個俘擄咗阿仔個心嘅女人,係一個可以令到阿仔開心嘅人。最初王后並唔想干涉;但後嚟為咗撮合佢兩個,仲將阿仔嘅情敵慕禮伯爵、占士·斯圖亞特遠離伊利沙伯嘅身邊。

最後伊利沙伯響1923年應承咗佢嘅第三次求婚。佢哋嘅婚禮同年4月26號響西敏寺搞。

1924年12月去到1925年4月,兩公婆先後訪問肯雅烏干達蘇丹,又去咗蘇彝士運河同埋亞丁旅行。期間,佢哋參加特大獎賞打獵。

公爵同夫人有兩個細路:大女伊利沙伯(1926年ー2022年),同埋細女瑪嘉烈(1930年ー2002年)。呢一家人當時住響皮卡地里街145號,而唔係乜嘢王宮。由於唔係王儲,令到兩公婆可以響比較正常嘅環境入面養大兩個女。一家四口都過得好溫馨。

退位風波同埋登基[編輯]

內文:愛德華八世退位風波
一張明信片,叫The Year of the Three Kings,相中嘅人物分別係:佐治五世,佐治六世,愛德華八世。呢張相係暗示緊一年內(1936年)換咗三位國王,亦有暗示愛德華引起嘅退位風波
佐治六世同王后伊利沙伯嘅加冕禮

老豆佐治五世響晚年,曾經對於大仔愛德華能唔能夠穩定政權表示懷疑,講咗啲咁嘅野:「響我死咗之後嘅十二個月之內,呢個仔會毀咗佢自己」、「我求上帝,希望我個仔愛德華唔好同啲乜嘢女人結婚,而伯堤(亞厘畢個花名)同莉莉畢(大女伊利沙伯個花名)唔會同王位有任何關係。」

1936年1月20號,佐治五世走咗,愛德華繼位成愛德華八世。新國王同佢三位細佬(亞厘畢王子亨利王子佐治王子)響老豆埋葬之前任人吊唁嗰陣,決定用輪班嘅方法去睇實老豆個棺材。

由於愛德華八世未結婚,所以當時王位假定繼承人係身為二細佬嘅亞厘畢王子。但係響同年12月11號,大佬愛德華為咗娶華莉絲·辛普森,簽咗協議要退位。因為當時華莉絲·辛普森仲有老公,英國聖公宗同時任首相寶雲都反對呢段婚姻;而身為準王儲嘅亞厘畢,亦建議大佬再搵另外一個女人。但愛德華「不愛江山愛美人」,最終都係揀咗退位。

當亞厘畢知道大佬嘅決定,佢好唔開心,因為佢根本唔想做國王。響加冕之前,佢去拜訪阿媽瑪麗王太后,佢響日記係咁寫:「當我話畀佢知發生嘅一切,我崩潰咗,好似成個細路咁喊。」

當時有好多流言話亞厘畢王子根本冇能力做國王,據知有人曾經建議瑪麗王太后先攝政,之後再畀細仔根特公爵佐治王子登基;原因係響四兄弟入面,根特公爵佐治王子係身體最好個位,而當時佢又有兩個仔,唔使驚冇繼承人[1][2]。但瑪麗王太后並唔接納呢個意見,反而更加支持亞厘畢;而英國內閣亦冇證據顯示佢哋想跳過亞厘畢王子。

亞厘畢王子最後響1937年5月12號正式加冕,揀咗自己最後一個名「佐治」嚟做王號,稱號係「佐治六世」。響加冕禮當日,阿媽瑪麗王太后亦都有出席,以表示自己對二仔嘅支持,係英國史上第一位出席英王加冕禮嘅王太后。

統治[編輯]

早期[編輯]

亞厘畢之所以揀「佐治」嚟做王號,係因為想通過同老豆佐治五世一樣嘅名,去重建民眾對王室信心;另外,由於大佬愛德華退位係會冇左王室成員身份,所以佐治冊封大佬做「溫莎公爵」。響登基之後三日,佢獲勳為嘉德勳章。

佐治六世一登基就要面對當時歐洲越嚟越有可能爆發戰爭嘅情形。由於英王響法律上有責任支持同遵守時任首相尼維爾張伯倫嘅姑息主義外交政策,所以當1938年張伯倫響談判完慕尼黑協定之後,佐治六世同王后就邀請佢到白金漢宮嘅露台上。由於同英王一齊出現響白金漢宮露台上多數係王室成員,所以首相嘅出現係獨特嘅。有一部份人反對,認為係「違憲」。

1939年5月去到6月,佐治六世去訪問加拿大同美國,係第一位訪問北美洲嘅英王;雖然佢本人響做王子嗰陣都已經去過。響渥太華,佢同加拿大總理威廉·利昂·麥肯齊·京見面。加拿大總督約翰·布根都表示國王響加拿大嘅存在充分顯示出西敏法令嘅原則,呢個法令將更大嘅權力交畀大英帝國自治領。同年5月19號,佐治六世親自接受同埋批准由新任美國駐加拿大大使Daniel Calhoun Roper嘅國書,又御准議會嘅法案。

二戰[編輯]

大英帝國蛻變[編輯]

[編輯]

  1. 80年前密件首曝光 英女王差啲做唔成君主. on.cc東網 (香港中文). 2016-04-21. 喺2021-09-01搵到.
  2. Wilson, Christopher. "Whitehall plot that (almost) changed the course of history" (英文). ISSN 0140-0460. 喺2021-09-01搵到.