香港學業能力測驗
香港學業能力測驗（英文：Hong Kong Academic Aptitude Test，HKAAT，通常叫做學能測驗），係香港教育署喺1978年至2000年配合香港中學學位分配辦法舉行嘅測驗，由中學學位分配組統籌。2000年前，呢個測驗同香港中學會考、香港高級程度會考並稱為香港三大公開考試，考生都係讀緊小學六年級嘅香港學生，喺2000年7月宣布取消[1]。
簡介
[編輯]測驗喺12月第一個禮拜嘅星期二下晝舉行，考生一定要帶小六學生證去獲分配嘅試場應考。呢個測驗完全免費，所有參加中學學位分配辦法嘅學生都要參加。測驗包括兩部份嘅多項選擇題試卷，一個係文字推理（Verbal Reasoning），另一個係數字推理（Numerical Reasoning），考核考生嘅邏輯能力，兩卷都係由電腦批改。文字推理卷只有中文版，而數字推理就有中、英文版。兩份試卷都係限時45分鐘，中途有50分鐘休息。數字推理係第一場，由下晝一點至下晝一點45分；第二場係文字推理，由下晝兩點35分至三點20分。因為測驗原意為咗防止操練試題，測驗試題會喺測驗完之後收返，歷屆試題亦係保密事項。考生亦唔會知道自己嘅成績，考生嘅得分就只有獲分派嘅中學知道。
測驗內容
[編輯]文字推理
[編輯]文字推理係考核考生嘅語文能力，共85條題目。題目形式可以分為11大類，分別為詞義辨別、重組句子、排句成段、詞語歸類、作用推理、相對關係、序列推理、類比推理、代號推理、邏輯推理、閱讀推理。
數字推理
[編輯]數字推理嘅內容一般取材自小學數學科課程，當中包括一啲難度較高嘅基本應用技巧同概念，共50條題目。基本考核嘅課題包括度量衡、圖形、分數、數型、單位兌換、組合、排列、方向、時間、數字嘅分類排列關係結合、因數、倍數、四則運算、價錢、統計、代數、周界面積、算式推斷、基本運算同關係、運算符號等等。
數字推理嘅題目可以歸納成五種唔同嘅推理技巧，分別係處理數字基本嘅技巧、應用程式解決慣常難題、應用程式解決非常規難題、推論事理測驗、觀察模式。