安藤櫻

安藤櫻
姓名原文	安藤サクラ
出生日	1986年2月18號  （38歲）
出生地	東京市
本名	安藤 さくら
國籍	日本
識嘅語言	日文
母校	Gakushuin Women's College
職業	演員
配偶	柄本佑
阿爸	奧田瑛二
阿媽	Kazu Andō
兄弟姊妹	Momoko Andō
[改維基數據]

安藤櫻（日文：安藤 サクラ，1986年2月18號—）係日本嘅一個女演員，曾經多次攞獎。同男演員柄本佑結咗婚後，戶籍名改叫柄本櫻。

家族

安藤櫻出身嘅家族都好出名，太公係前日本首相犬養毅，而阿公係前法務大臣犬養健。阿媽係犬養健嘅私生女、女作家安藤和津，老豆係出名嘅電影監督奧田瑛二（原名安藤豐明），而家姐係電影導演安藤桃子。佢嘅遠房親屬係國際協力機構前理事長緒方貞子，表哥係犬養千春。

安藤櫻嘅老公係男藝人柄本佑，兩個人響2008年識嘅。因為柄本佑出身於演藝世家，老豆柄本明同阿媽角替和枝都係日本有名嘅演員，所以呢場戀情好受到日本市民留意。響拍拖三年後就談婚論嫁喇，最終佢哋響2012年結婚。2017年6月，安藤櫻生咗個女。

經歷

響安藤櫻五歲嗰陣，佢睇到由老豆奧田瑛二主演嘅舞台劇，因而想做演員，但因為老豆阿媽都係演員，唔希望畀人唱為「演藝世家」，因而放棄呢個夢想。直到高中時期，佢響唔少餐廳打完工後，決定加入娛樂圈。

2007年，安藤櫻正式出道，第一個作品係由老豆監督嘅電影《風之外側》。2009年，佢響由園子溫監督嘅電影《愛的曝光》入面因為好好嘅發揮而開始有人睇起佢。

2011年，佢以《健太與純與加世的國度》而走紅；2012年以《愛與誠》攞到日本電影旬報獎、橫濱電影節、報知電影獎同埋每日電影獎嘅最佳女配角；一年後又以《家族的國度》攞到藍絲帶獎、日本電影影評大獎同埋日本放送電影藝術大賞最佳女主角獎，成為電影旬報獎史上第一個同時之間攞到最佳女主角同配角嘅演員。

2014年，佢以《百元之戀》第二次攞到藍絲帶獎、電影旬報獎同埋每日電影獎嘅最佳女主角。同年佢畀電影旬報選為「日本電影史上100位女演員榜」入面嘅第八名。

2017年，安藤櫻出席東京國際電影節

2017年大女出世，同年安藤響第40屆日本電影學院獎入面同西田敏行做司儀，同時都有出席東京國際電影節。

2018年，佢有份拍嘅《小偷家族》出嗮名，攞到第71屆康城影展嘅金棕櫚獎，響世界打響名堂。同時，佢以呢套電影分別攞到好多嘅女主角獎，其中響每日電影獎、電影旬報獎入面仲同老公柄本佑一齊攞到男女主角獎，成為日本史上第一對兩公婆都可以包嗮男女主角獎。