家有囍事
想搵同名電影系列嘅話，請睇家有囍事系列。
《家有囍事》（All's Well End's Well）係香港喺1992年出嘅電影，亦係農曆新年嘅「囍事系列」賀歲片之一。
電影資料
[編輯]制作
[編輯]人物簡介
[編輯]故事係現代背景嘅喜劇。
常氏一家係一個大家庭，屋企除咗有老父老母兩個老人家之外，重有大哥常滿，二佬常騷，同埋拉仔常歡；除此之外重有常滿個老婆程大嫂，同埋間唔中嚟常家滾搞兼幫老人家按摩嘅表姑媽梁無雙。
常老先生同常老夫人係一對面懵心精嘅活寶貝；平時呆若木雞扮老人癡呆，成日問非所答，日日就淨係識得對住部電視機，但係有時又心水清到冇人有，真係冇人知佢哋幾時係清醒，幾時係癡呆。
大佬常滿老成持重，係白領一族，亦係常家嘅支柱，日出而作日入而息，係一個放咗工都唔會有咩應酬嘅人；佢個老婆程大嫂係一個賢良淑德，持家有道又孝順翁姑嘅好新抱，不過因為唔需要點應酬，唔駛點見人，所以搞到成個超級黃面婆咁款，有時咀邊重會有鬚根。
二佬常騷係一個女人型，未婚，係社區中心教插花，個人姿整不特止，連睇嘢嘅眼光都係由女性角度出發，佢嘅鬥氣冤家就係佢嘅表姑媽梁無雙；無雙係常氏幾兄弟嘅表姑媽，係兩個老人家嘅表姐，但係其實佢好後生，同常騷差唔多大，只因為上一輩好晚年先生佢，所以年紀細輩份大，可能亦因為咁，佢嘅個性好剛烈，成個男人頭咁，同常騷正正係兩極唔同嘅人。
拉仔常歡係一個電台嘅唱片騎師，同時亦係一個花心情聖，成日週圍識女仔，專氹人上床，係一個冇道德觀念嘅情場浪子，而且成日恃住自己係孻仔多人o錫就肆無忌憚。
重有一個女仔叫何里玉，係常歡喺電台節目裏面嘅忠實聽眾；為人神經質，極忠於美國荷里活文化，嗰期有乜嘢荷里活嘅新戲上演，佢就會學足人哋嘅造型同埋談吐。
另外重有一個專做人情婦嘅Sheila，成日渴望嫁入豪門可以做少奶奶、金絲雀，實行唔憂食唔憂住。
劇情大綱
[編輯]開頭嘅劇情分開幾路發展：
常歡喺電台遇到佢嘅忠實聽眾何里玉，但係何里玉覺得佢喺空氣中嘅聲音同真人嘅內涵有好大出入，完全唔係想像中咁激情浪漫，於是阿歡想盡辦法去以荷里活電影嘅扮相嚟同何里玉相襯，企圖得到阿玉嘅肉體。
另一方面，大佬常滿開始覺得屋企個黃面婆冇乜趣味，有時帶出街重會失禮自己，於是喺出面搵咗個情婦 Sheila；後嚟 Sheila 不擇手段咁殺入常家，迫走咗程大嫂，而 Sheila 就直頭入主咗常家。
常騷方面，成日同無雙表姑媽鬥氣，梁無雙為咗激常騷，走去常騷做嘢嗰間成人社區中心教腳底按摩實行打對台；後來無雙表姑媽去到常家，俾兩個老人家撩打台灣麻雀，三缺一就搵埋阿騷開檯，點知無雙一家輸三家慘敗，因此極唔順氣而令到同阿騷嘅敵對氣氛加劇。
常歡喺日本同何里玉一夜情之後，返到嚟香港就另結新歡，終於有次喺屋企俾痴情嘅阿玉撞破佢同另外一個女仔光脫脫咁喺房入面，常歡因此而俾兩個女仔圍攻，喺閃避嘅時候意外咁俾樹上面嘅鵪春蛋扑中咗未埋口嘅腦筍，令佢患上咗「無定向喪心病狂間歇性全身機能失調症」嘅罕見精神病；呢種病令患者嘅情緒完全失控，行為亦無跡可尋，有時會精神分裂，有時會癲癎，有時會抑鬱，重會有自殺傾向……等等；阿歡身邊嘅女朋友因為咁而走晒，但係心有不甘嘅何里玉就扮成咗私家看護，去常家假借照顧阿歡而搵機會報仇，點知阿玉同 Sheila 都俾阿歡嘅無定向病玩到發神經；阿玉因為報唔到仇而十分之沮喪，正要入房搵阿歡告別嗰時，見到阿歡特登整咗份禮物送俾佢，令佢大為感動而施展阿歡嘅接吻絕招巴黎鐵塔反轉再反轉，令阿歡大量谷血上腦，就係呢一吻令到阿歡個病好返。
程大嫂出走之後，去咗一間卡啦OK夜總會度做打碟兼陪唱，開頭成個師奶咁款搞到自己無客要，後來經阿騷點化之後，就決定發奮圖強改頭換面而變成一個冶艷女郎；有一次常滿咁啱嚟呢間夜總會同日本仔傾生意而撞到程大嫂，佢見自己個老婆變得咁正斗，就想追返自己老婆，甚至當佢係情婦都願意；原來自從阿 Sheila 入咗常家之後，個個月使錢好似倒水咁，買衫買嘢都使成十幾萬（港元），又唔識做家務搞到屋企一鑊泡，搞到老人家同埋屋企人都有怨言，所以呢一刻常滿發覺原來自己個老婆先至係好嘢；不過程大嫂心裏面雖然都好想重修舊好，但係又好嬲常滿當初咁對佢，所以拒絕咗常滿嘅追求。
到咗兩個老人家喺屋企擺大壽嘅日子，親朋好友都嚟常家祝賀，而常騷鍾情嘅表妹婉君同無雙表姑媽鍾情嘅表哥家明都有嚟賀壽，重即場宣佈咗婚事，可惜兩個鬥氣冤家嘅「愛人結婚了，新郎新娘不是我」，兩個人閃咗入房度一齊喊，繼而惺惺相識，開始咗段新嘅情侶關係。
後來何里玉亦都嚟到常家賀壽，點不知入去見到常歡俾大班女仔圍住細聲講大聲笑，正當發脾氣想走嘅時候，阿歡個頭又俾嘢扑親而搞到再次癲癎，身邊啲女仔即刻唔見晒，但係阿玉就好緊張咁即刻扶咗佢上房；原來阿歡係扮癲嚟睇吓邊個先係真心，於是兩個人個心就咁就走埋咗一齊。
程大嫂都有返嚟賀壽，常滿一見到大嫂就即刻想挽留佢，但大嫂仍然不為所動；Sheila 睇見常滿對以前個老婆咁留戀，即刻發晒脾氣話要離開常滿走去新加坡做人情婦。大嫂走咗，Sheila 又走埋，最後剩低常滿一個人飲悶酒……
兩個老人家見到咁情況，唯有親自出馬，帶住阿騷阿歡兩對情侶一齊操到去卡啦OK，幫大佬搵返程大嫂返屋企，故事就咁而大團圓結局。