富士山下
| 《富士山下》 | ||
|---|---|---|
| 陳奕迅嘅單曲 | ||
| 收錄喺專輯《What's Going On...?》 | ||
| 類 | 粵語流行 | |
| 時長 | 4:17 | |
| 填詞 | 林夕 | |
| 作曲 | 澤日生 | |
| 編曲 | 陳珀、江志仁 | |
| 監製 | 梁榮駿 | |
| 音樂影片 | ||
 YouTube上面嘅《富士山下》 |
||
《富士山下》（英文：Sorrow Is Meaningless）係香港歌手陳奕迅嘅粵語音樂歌曲，收錄於專輯《What's Going On...?》。呢首歌另有國語版本叫做《愛情轉移》。
據悉，林夕創作呢首詞嘅初衷源自於佢嘅「富士山愛情論」──佢認為鍾意一個人，就好似鍾意富士山，可以睇到佢，但唔可以搬走佢。移動一座富士山嘅方法只有自己走過去，愛情都一樣，逛過就已經足夠[1]。
創作
[編輯]《相思祭》：澤日生塵封之作
[編輯]作曲人澤日生早喺1997年讀大學嗰陣就已經寫好咗呢首歌，當時只係用咗15分鐘。但由於當時嘅錄製效果唔理想，所以暫時放棄咗發表嘅念頭。多年過去，澤日生一直冇放棄過尋找機會去發表呢首塵封咗咁耐嘅作品。直到2006年，佢決定重新錄製，自己一手包辦咗作曲、編曲同監製嘅角色，仲搵咗張欣渝填寫國語歌詞，由佢嘅好朋友同時亦係作曲人嘅楊淽主唱，呢首歌就係後來《富士山下》嘅前身《相思祭》。而《相思祭》亦成為咗後來澤日生參加全球華人作曲比賽嘅參賽歌曲，可惜攞唔到任何獎項。[2]
《悲哀無用》：由比賽失利到《富士山下》誕生
[編輯]
雖然作曲比賽落選，但比賽嘅評判之一梁榮駿覺得呢首曲可塑性好高，有流行特質，於是揾咗澤日生合作。當時監製陳奕迅《What's Going On...?》大碟嘅梁榮駿將呢首曲交畀林夕，畀佢重新填一份同《相思祭》詞風完全唔同嘅粵語歌詞出嚟。最後林夕將自身嘅東京之旅回憶融入到歌詞之中。[3]梁榮駿亦揾咗陳珀同江志仁重新編曲，前奏嗰段鋼琴獨奏就係由陳珀所彈奏。陳珀表示喺為《富士山下》編曲嗰陣，腦海中出現嘅係一幅淒美嘅畫面，有如富士山下涓涓清泉一般嘅旋律喺佢嘅心入面流淌[4]。
有關獎項或提名
[編輯]- 2006年度叱吒樂壇流行榜頒獎典禮－專業推介 叱吒十大（第二位）
- 2006年度SINA Music樂壇民意指數頒獎禮－最高收聽率歌曲（第六位）
- 2007年度勁歌金曲優秀選 - 第一回金曲
- 2007年度CASH金帆音樂獎－最佳男歌手演繹獎（流行音樂）
- 2007年度CASH金帆音樂獎－最佳歌曲大獎
- 第三十屆十大中文金曲頒獎禮－十大中文金曲獎
- 第三十屆十大中文金曲頒獎禮－全國最佳中文歌曲獎
- 第三十屆十大中文金曲頒獎禮－全球華人至尊金曲獎
- 2007年度新城勁爆頒獎禮－新城勁爆我最欣賞歌曲
- 2007年度十大勁歌金曲頒獎典禮－十大勁歌金曲
- 第七屆全球華語歌曲排行榜－20大最受歡迎金曲獎
- 2007年度TVB8金曲頒獎典禮－觀眾最愛粵語歌曲
- 2007年度中國移動無線音樂排行榜－最暢銷粵語金曲獎（下載1320204次）
- 2010年度CASH金帆音樂獎－十週年樂迷至愛大獎－最佳旋律
- 2010年度CASH金帆音樂獎－十週年樂迷至愛大獎－最佳歌詞
英國諺語傳說
[編輯]「試管裡找不到它染污眼眸」呢句歌詞係成首歌嘅精髓之一，反映咗一種關於情感與科學之間嘅矛盾。一直有傳佢係同英國諺語"Can’t identify sadness through test tube"（無法用試管找出悲傷）有關。但事實上，呢句所謂英國諺語從來剩係喺中文網絡上流傳。
引用
[編輯]- ↑ 〈陈奕迅新碟破金唱片销量 主打歌透露林夕爱情论〉。《新浪娱乐》。
- ↑ 〈細說港樂 Vol.5〉。
- ↑ 〈細說港樂 Vol.5〉。
- ↑ 〈陈珀：陈奕迅背后的"声音"〉。《新浪网》。
- ↑ 〈What 's Going On？ 好像大家都很慌张〉。《新浪网》。