小孩不笨2 (電視劇)
《小孩不笨2》（英文：I Not Stupid Too），係星加坡新傳媒電視2006年製作嘅電視連續劇，延續同名電影劇情。故事講述三個學生嘅家庭壓力，探討嘅係星加坡教育制度弊病，包括星加坡學生唔重視華語問題等。故事以滑稽嘅方式表達普遍家長對仔女嘅錯誤管教方式，並透過兩個中學生（楊學謙、成才）嚟表現出少年人喺青春期嘅戀愛情節同反叛期嘅心理。
劇情簡介[編輯]
自從劉成才嘅爸爸過身之後，成才返到學校讀書，佢下定決心努力讀書，回報爸爸嘅愛。喺符老師嘅鼓勵之下，佢亦參加咗學校嘅武術學會，正面噉發揚中華武術。
Tom（楊學謙）同埋Jerry（楊學強）兩兄弟嘅屋企亦有咗變化，爸爸Steven被派去上海工作，媽媽秀梅辭咗雜誌編輯嘅工作，做特約記者，以方便自己喺屋企照顧兩個仔同奶奶，母兼父職嘅佢面對教育仔女嘅問題，婆媳相處上，有時亦會遇到頗為困難嘅問題。
成才將組屋出租，賺取零用錢，Tom邀請成才喺佢屋企度住。成才唔想寄人籬下，亦擔心Tom嘅媽媽唔鍾意佢。於是，Tom嘅細佬Jerry開始出主意，設局令到媽媽答應呢件事。點知事情弄巧反拙，鬧出笑話，好彩已經受感動嘅秀梅，最後邀請成才一齊住，令到成才無限感激。
屋企多咗一個冇關係嘅成員，摩擦自然就多咗。首先，女傭Yati對成才大細超，陽奉陰違，唔肯幫成才清理房間、洗衫，唔單止睇唔起成才，亦將做錯嘅事推到成才身上，令佢成日俾人屈。嫲嫲愛孫心切，對成才雖然亦疼愛，都難以避免大細超，好嘅嘢都留畀自己嘅孫，導致Tom對嫲嫲不滿，嫲孫起咗爭執。懂事之後就冇同女人相處過嘅成才，束手無策，好彩學校嘅年輕老師郝樂天傳授同女人相處嘅秘笈，先至令到Tom同成才慢慢開啟咗佢哋嘅心。
郝樂天老師係E世代人類，活潑開朗，同班學生都冇鴻溝，提倡賞識教育嘅佢，最唔鍾意說話傷害人。學校裏面嘅英文Miss陳潔對佢有好感，擺明追求佢，唔識得拒絕人嘅郝樂天非常為難，甚至請班學生幫忙向陳潔表態，點知重搞到陳潔更誤會郝樂天亦都對佢有意思。
一向古板嘅符大炳老師同郝老師頻密接觸之後，亦受到郝老師嘅影響，開始接受新事物，更體會到賞識、器重一個人嘅爆發力。符老師毛遂自薦義務幫忙為Jerry同成才補習華文，經常到Jerry屋企。秀梅同符非常投契，成為咗好朋友，符更時常幫忙處理楊家男人做嘅粗重事務。時常到Jerry屋企嘅老闆娘，成才嘅監護人對嫲嫲危言聳聽，誤會秀梅同符老師關係親密，搞咗一場小風波，好彩得到班細路嘅幫忙，先至得以平息。
班上同學晶晶活潑可愛，令到Tom同成才都情不自禁鍾意咗佢。有性格嘅晶晶對佢哋兩個都唔係太有意思。好奇嘅Jerry無意中發現咗成才對晶晶嘅情意，成才亦知道原來Tom亦鍾意晶晶。兩個好朋友，開始互相嫉妒，友誼面臨考驗。最後兩個決定各自向晶晶表態，結果佢哋發現原來自己自作多情，晶晶只將佢哋當作好朋友。晶晶話佢兩個知，佢哋重讀緊書，應該專心放喺學業上，要出招比劃，應該放喺學習場上，唔好枉廢青春歲月。令到Tom同成才兩個非常感動，決心努力讀書。