少新權

出自維基百科,自由嘅百科全書
Jump to navigation Jump to search

少新權1904年1966年3月22號),原名陳利權,係香港粵劇同電影演員。由於佢鍾意赤膊,被粵劇行嘅人叫做「豬肉佬」[1]

生平[編輯]

少新權喺清朝上海縣張家店出世,7歲父母雙亡,9歲由上海南下廣州,寄住喺阿叔屋企,並喺廣州河南大基頭嘅「梁本生醫館」做後生。10歲拜男花旦周錦波(細旺)為師學粵劇,被師母粵劇艷旦銀老鼠(陶三姑)安排入「超群樂」(兒童粵劇戲班)做「三步針」,正式參加粵劇商業性演出;21歲應聘一個人去到美國舊金山,同蘇州麗、黃侶俠、衛少芳同西麗霞等人一齊演出,被觀眾致送最重嘅金牌,三年半後返中華民國,就得到「金牌小武」嘅美譽。佢最後一次舞臺演出喺南越首都西貢,為「大龍鳳劇團」演出[2]

少新權亦係電影明星,從銀幕處男作《火燒阿房宮》(1952年,飾演秦始皇)到電影遺作《倚天屠龍記三集》(1965年,飾演空智禪師),一生演出約200齣電影。

社交圈[編輯]

1964年7月6號,喺九龍油麻地志和街嘅「百老匯酒店」(而家嘅「聖地牙哥酒店新館」)502號房,少新權同其它梨園子弟鄧偉凡、何驚凡、蕭仲坤、林蛟、蘇少棠、陳錦棠、白龍珠同埋羅家權等組成長期性嘅「先生俱樂部」,性質係聯絡感情同守望相助,談古說今,研究傳統藝術同埋打蔴雀[3]

病逝[編輯]

1965年12月27號入咗伊利沙伯醫院留醫,到1966年1月6號轉到九龍醫院。3月22號凌晨3點,喺九龍醫院因高血壓症病逝,享年62歲[4]3月23號下晝3時,喺九龍殯儀館舉殯,遺體葬九龍長沙灣天主教墳場[5]

佢留低老婆同兩仔一女:

  • 大仔:陳兆祥(13歲,嗰時讀緊新法小學六年級)
  • 女:陳婉冰(11歲,嗰時讀緊真光小學)
  • 細仔:陳兆昌(7歲,嗰時讀緊聖方濟各小學)

參考[編輯]

  1. 1977年6月10號,香港華僑日報》,第七張,第二頁。
  2. 1966年3月23號,香港《華僑日報》,第六張,第一頁。
  3. 1964年7月7號,香港《華僑日報》,第六張,第二頁。
  4. 1966年3月23號,香港《華僑日報》,第六張,第一頁。
  5. 1966年3月24號,香港《華僑日報》,第六張,第一頁。

出面網頁[編輯]