尖沙嘴福德古廟

尖沙嘴福德古廟，又叫尖沙咀土地廟，係香港九龍尖沙嘴現存唯一唐人廟宇，係一間土地廟，供奉福德土地公，喺海防道近住九龍公園徑下低。座廟現址喺1900年起好，1979年同1993年重修過。

歷史

尖沙咀福德古廟嘅歷史可以追溯到19世紀尖沙咀村嘅土地廟。1900年，廟宇起喺現址，並得到附近九龍倉碼頭嘅華籍工人同埋附近嘅華人街坊尊崇。直至1978年，香港政府曾計劃清拆呢間廟，想將北京道嘅街市搬去嗰到，但因遭到街坊嘅反對，間廟先得以保留。1979年，間廟重建成而家個樣，並曾經喺1993年重修。

尖沙咀福德古廟嘅正門門額同對聯寫住：【共仰福德神威，百載街坊沾惠澤】，【重新社公廟貌，萬民香火展明煙】，係廖烈文題嘅。