尤德觀鳥園

尤德觀鳥園（Youde Aviary）喺香港公園內，佔地3000平方米，係世界上最大嘅觀鳥園之一。觀鳥園嘅雀仔可隨意喺遊客面前周圍飛。

設計構思

市政局管嘅香港公園喺1992年9月開放啱啱起好嘅觀鳥園畀市民參觀。觀鳥園以已故港督尤德爵士命名。佢響1982年至1986年做港督。

觀鳥園有一條行人道，設計到輪椅都行得；遊人可以響唔同高度睇樹、植物同雀仔，同埋由唔同角度欣賞園內嘅全景。

園內底層設有淺水池同小瀑布，流向園內地勢較低嗰邊，最後喺一個大型水池滙合。呢個水池同位於園外出口嘅小型人工湖相連，響禽流感出現前，人工湖係欣賞水禽嘅地方。

喺觀鳥園嘅入口度展出咗唔少圖文並茂嘅資料，介紹熱帶雨林嘅結構同生態系統，而且重特別介紹林內雀鳥群落。出口位於園內地勢較低嗰邊，遊人可以沿住行人天橋單向漫步而下，沿途設有多個觀景台。

為免觀鳥園內出現礙眼嘅支柱，建築師用咗4個跨越整個觀鳥園嘅巨大拱架，將不透鋼圍網托起嚟。圍網覆蓋範圍約3000平方米。上蓋最高點離園內底部達30米。

除咗現有樹木，觀鳥園內外亦種咗大量植物；假以時日，會遮住大部分圍網。

展出嘅雀仔來自馬來西亞熱帶雨林，近年園內亦養埋本地林鳥。

馬來群島係一個植物區，範圍廣闊，由馬來半島同大巽他群島（即蘇門答臘、婆羅洲同爪哇）、菲律賓同所有印度尼西亞島嶼起，伸展至新畿內亞同俾斯麥群島。

呢啲雨林有地球上最高嘅雨林樹木，亦係多種動物棲息之地，其中包括一啲世界上最靚嘅雀仔。

觀鳥園嘅雀仔，大多嚟自馬來群島，但近年亦有飼養本地鳥種，例如珠頸斑鳩。有響地上棲息嘅雉雞、鷓鴣、鳩鴿同鶇等。有啲品種，例如產新畿內亞嘅鳳冠鳩，而家重瀕緊危。重有大眼斑雉、擬啄木鳥、鳴禽類等。總數大約90品種近700隻。

以前有養馬來鼷鹿，響觀鳥園內自由奔跑，而家無養嘞。

起觀鳥園之前，山谷已經有一啲成齡樹；公園施工期間，呢啲樹木大都得以保存。此外，觀鳥園亦種咗好多樹木。

園內盡可能引入源自馬來群島嘅植物或相似品種，以適應香港冬天。

樹木品種主要係無花果樹（例如唔同品種榕樹）、木棉、石栗、棕櫚樹、竹及羊齒植物等，豐富林內植物品種。

水禽湖位於觀鳥園旁邊，原本係養塘鵝同其他水禽嘅地方。自從禽流感爆發後，為免受到感染，塘鵝已經搬咗去園內飼養，水禽湖亦都唔用。

2005年9月，觀鳥園從澳洲買咗3隻塘鵝。如果水禽湖未棄用，應該會喺呢度養。

由於大隻嘅犀鳥會捉其他雀仔食，所以觀鳥園編咗佢哋去入口旁嘅展覽區內，展覽區而家重整緊。

每日上晝9:00至下晝5:00

唔使錢